Vetëm një sistem i ri dhe i reformuar i drejtësisë, i kombinuar me punë efektive të Komisionit për Antikorrupsion në bashkëpunim me ekzekutivin, përbën metodën reale për luftimin e korrupsionit në vend.
Kështu deklaroi zëvendëskryeministri Arben Fetai në forumin rajonal “Nga politika në impakt”, ku u diskutua avancimi i reformave në Ballkanin Perëndimor.
Fetai njoftoi se qeveria së shpejti do të miratojë strategjinë e re kundër korrupsionit, e cila pritet të jetë një shtyllë shtesë në këtë betejë. Ai theksoi se problemi kryesor mbetet sistemi i drejtësisë, i cili sipas tij është jofunksional dhe nuk gëzon besimin e qytetarëve.
“Asnjë vendim përfundimtar për korrupsion të nivelit të lartë”
“Në vitet e fundit, sistemi i drejtësisë nuk ka prodhuar asnjë vendim përfundimtar në rastet e korrupsionit të nivelit të lartë. Bashkimi Evropian çdo vit kërkon dënime përfundimtare, ngrirje dhe konfiskim të aseteve të fituara në mënyrë të paligjshme. Qasja jonë si qeveri është të përshpejtojmë reformat përmes bashkëpunimit me Kuvendin, në mënyrë që t’i rikthejmë kredibilitetin Prokurorisë dhe të kemi drejtësi që e kryen rolin e saj represiv”, tha Fetai.
Ai shtoi se përveç drejtësisë, sfida të ngjashme ka pasur edhe në Komisionin për Antikorrupsion, duke theksuar se vendi varet edhe nga efikasiteti i këtij institucioni.
Hudolin: Lufta kundër korrupsionit kërkon bashkëpunim vendor e rajonal
Përfaqësuesi i BE-së, Stefen Hudolin, theksoi se korrupsioni është dukuri e shpërndarë dhe asnjë vend nuk është imun ndaj tij. Sipas tij, lufta efektive kundër korrupsionit kërkon një gamë të gjerë aktorësh dhe bashkëpunim të hapur ndërmjet vendeve të rajonit.
“Zgjidhja më e mirë vjen nga bashkëpunimi, inspirimi dhe shkëmbimi i praktikave të mira. Institucionet e fuqishme dhe të përgjegjshme janë kusht themelor. Liderët politikë duhet të vendosin standardin, ndërsa pushteti dhe opozita duhet së bashku ta promovojnë kulturën e integritetit. Parlamenti duhet të miratojë ligje me standarde të larta”, deklaroi Hudolin.
Pjesëmarrësit në forum theksuan se luftimi i korrupsionit jo vetëm që rrit besimin e qytetarëve në institucionet shtetërore, por është edhe një nga kriteret kyçe për të përparuar drejt integrimit në Bashkimin Evropian.