Si çdo të hënë, mbështetësit së opozitës janë mbledhur para Kryeministrisë për të zhvilluar “Foltoren 2” të thirrur nga kryedemokrati Sali Berisha.
Por grumbullimi i sotëm përkoi me 8 Dhjetorin, “Ditën e Rinisë”. Në fjalën e tij, Sali Berisha përkujtoi heronjtë e Dhjetorit të 35 viteve më parë, të cilët u përballën me regjimin diktatorial.
Berisha tha se, ndryshe nga 35 vite më parë kur studentët e Dhjetorit nuk kishin një parti politike që t’i mbronte, sot shqiptarët kanë Partinë Demokratike.
“Kjo gjeneratë është bërë zëdhënësja më e mirë e aspiratave njerëzore. Po të kthehemi 35 vite më parë, studentët e UT ishin në kushte më të pakrahasueshme se studentët e asnjë vendi tjetër. Në Shqipëri çdo përpjekje ishte shtypur dhe vendimi i përgjithshëm dukej se për Shqipërinë ishte: ‘Kështjellë e Socializmit në brigjet e Adriatikut’.
Një grup i vogël studentësh nuk qenë dakord dhe një natë të 8 Dhjetorit dolën në protestë në qytetin e tyre. Ata, në 1 të natës, u pritën nga Presidenti i Republikës së asaj kohe, i cili pas takimit u rezervoi atyre kërbaçin e Sigurimit të Shtetit.
Të nesërmen ata mbushën sheshet dhe rrugët, qëndruan dhe në një betejë 3-ditore gjunjëzuan regjimin më të egër, më shtypës dhe më represiv të kohës. Sot, pas 35 vitesh, nuk jemi më një diktaturë moniste. Për studentët e Dhjetorit nuk kishte një forcë politike t’u dilte zot. E vërteta është se edhe qytetarët, të trembur dy ditët e para, nuk patën guxim. Kurse sot shqiptarët kanë një forcë politike dhe kjo është Partia Demokratike, parti e themeluar nga studentët e Dhjetorit, parti e idealeve të Dhjetorit. Kjo është partia e vetme në vendet ish-komuniste që mbijetoi të gjitha tallazet politike dhe ndodhet sot këtu e betuar për të kthyer idealet e Dhjetorit: votën e lirë, familjen shqiptare dhe interesin kombëtar”, tha Berisha.