Këshilli Kombëtar i integrimit tashmë do të ketë bashkëdrejtim mes opozitës dhe mazhorancës.
Me 79 vota pro, parlamenti votoi ndryshimin, ndërsa më herët Këshilli i Integrimit udhëhiqej vetëm nga demokratët.
Ky vendim i Kuvendit shkaktoi debate mes palëve politike, pasi demokratët pretenduan se ky hap u mor pa konsultimin e tyre.
“Ju e nisët këtë legjislaturë duke shkrirë Komisionin e Integrimit, vetëm për t’i hequr opozitës rolin thelbësor që ka në procesin e integrimit. Po na e shisni këtë projektligj sikur po i jepni opozitës një rol si bashkëdrejtuese në Këshillin e Integrimit, kur në fakt opozita historikisht ka patur drejtimin”, tha deputeti demokrat Gazment Bardhi.
Madje Bardhi akuzoi se mazhoranca po kërkon t’i heqë opozitës, rolin e saj në procesin e integrimit, duke paralajmëruar bojkot.
“Nëse ka një ligj që propozohet në konflikt interesi, është ky. Taulant Balla propozon të bëjë veten bashkëkryetar të Këshillit të Integrimit. Në emër të grupit të PD, po e deklaroj këtu: Ky është Këshilli juaj. Ne nuk marrim më pjesë në Këshillin e Integrimit”, tha Bardhi.
Megjithatë, mazhoranca solli në vëmendje se vende të tjera, tashmë anëtare të Bashkimit Evropian kanë ndjekur të njëjtën skemë.
“Ky projektligj garanton balancë politike dhe dialog të strukturuar. Kjo nuk është thjesht një zgjedhje teknike organizative, është një zgjedhje politike që shpresoj se ju përcjell të gjithëve një mesazh të qartë, procesi i anëtarësimit në BE nuk është thjesht një projekt i mazhorancës. Mund të jap shembuj disa vende të unionit, të cilët kanë ndjekur të njëjtën formulë gjatë procesi të tyre e tashmë janë pjesë e Bashkimit Europian”, tha deputetja socialiste Bora Muzhaqi.
Më herët socialistët kanë lajmëruar se janë një sërë ligjesh që duhen miratuar në kuadër të procesit të anëtarësimit, ndërsa një pjesë e madhe e tyre duhet të kalojë në parlament brenda vitit të ardhshëm.