Komisioni për Ekonominë, Punësimin dhe Financat prodhoi debat mes deputetëve gjatë shqyrtimit dhe miratimit të projektligjeve të paketës fiskale.
Ndërsa po diskutohej projektligji i rimbursimit të fermerit, deputeti Agron Shehaj kërkoi fjalën, po kryetarja Milva Ekonomi iu përgjigj duke sqaruar se prioritet kanë anëtarët e përhershëm, e më pas ata zëvendësues.
“Edhe vetë po e përjashton veten nga ky Komision, sepse po na drejtohesh me ‘ju’. Prandaj them që nuk jeni anëtar si gjithë të tjerët, jeni zëvendësues. Nuk keni marrë pjesë në seancat paraprake. Fjalën e merrni pasi të sqarojmë ne që po punojmë për këtë çështje”, tha Milva Ekonomi, kryetarja e komisionit
“Më ndërpretë fjalën. Ju mendoni se jemi në shkollë ose në kopsht dhe thoni: ‘Kush ka ardhur më shumë, do flasë më shumë’. Mos e bëni këtë komision më qesharak se ç’është”, u shpreh deputeti Agron Shehaj.
Pas kësaj ndërhyri deputeti Erion Braçe me tone të ashpra ndaj Shehajt, duke ndërprerë seancën. Ky i fundit u përjashtua nga komisioni.
“Nuk vjen dot këtu dhe të na ofendosh ne. E ke bërë një herë, dy herë… Boll po të them! Qepe po të them!”, deklaroi deputeti i PS Erion Braçe.
Pas rikthimit në normalitet, deputeti Braçe propozoi disa ndryshime në projektligjin për rimbursimin e fermerit. Ai kërkoi që e drejta e rimbursimit të mos u jepet vetëm atyre që e çojnë mallin tek grumbulluesit apo përpunuesit, por edhe atyre që shesin në tregjet e lira nëpër bashkitë e vendit, ku produktet blihen drejtpërdrejt nga konsumatorët.
“Prej 4 vitesh sektori i bujqësisë ka rënë dhe ndikimi në PBB është në rënie. Ky qëndrim i Ministrisë së Financave, sipas meje, e godet qëllimisht këtë sektor duke mos i dhënë prioritet. Në çdo qytet janë krijuar tregje bujqësore ku çdo hapësirë është e regjistruar me NIPT dhe janë biznese të vogla, ndërsa ju thoni se nuk do t’i kompensoni, por vetëm ata që e çojnë mallin te grumbulluesit.”, theksoi Braçe.
Këto propozime nuk u morën parasysh nga Ministria e Financave, e pranishme në komision, duke u miratuar vetëm në parim projektligji ekzistues./vizionplus.tv