Kryeministri Edi Rama ka reaguar sërish sa i përket pezullimit të zëvendëskryeministres Belinda Balluku me vendim të Gjykatës së Posaçme.
Në një postim në rrjetin social “X”, teksa e cilësoi situatën si jo normale, kreu i qeverisë dhe një herë theksoi pasojat që mund të sjellin vendimet e drejtësisë së re.
“E pra, pavarësisht se nga dita 1 kam qenë, jam e do të jem mbështetësi më i paepur i Reformës dhe Pavarësisë së Drejtësisë, këtë risi botërore të drejtësisë sonë të re, unë nuk e quaj dot asgjë tjetër përveçse një nga ato rrëzimet e fëmijës kur sapo ka mësuar të eci. Me ndryshimin që kur fëmija i vërtetë rrëzohet, lëndon vetëm vetveten, ndërsa kur drejtësia rrëshqet kështu si këtë herë, cenon parimet kushtetuese, prish balancën mes pushteteve të pavarura dhe ndërhyn brutalisht në procesin qeverisës”, tha Rama.
Sipas Ramës, vendimet e gabuara mund të kthehen në një boomerang.
“Qëllimi i lartë i luftës kundër korrupsionit nuk e justifikon përdorimin e asnjë mjeti të gabuar dhe historia e vendeve që kanë kaluar më parë nga kjo rrugë e domosdoshme, na mëson se justifikimi i mjeteve të gabuara për hir të qëllimit madhor, e kthen kurën me mjete të tilla, në një të keqe edhe më të madhe se sa vetë sëmundja që thuhet se këto mjete po kurojnë. Ky mësim nuk duhet harruar kurrsesi. Nga askush”, shtoi Rama.
Vendimi i GJKKO për Ballukun është ankimuar në Gjykatën Kushtetuese nga vetë kryeministri Edi Rama, i cili më herët është shprehur se pa fjalën e gjykatës më të lartë të vendit, qeveria do të vijojë punën pa një numër dy./vizionplus.tv