Mbledhja e Gjykatës Kushtetuese këtë të premte për “fatin” e Erion Veliajt ka një interes shumë të madh për publikun, pasi ky i fundit do të jetë i pranishëm.
I ftuar në studion e Quo Vadis të moderatores Pranvera Borakaj, analisti Ermal Hasimja tha se e nesërmja ka shumë interes për opinionin publik, në dy aspekte.
Sipas tij, aspekti i parë është ai njerëzor, ku për herë të parë do të shihet sjellja e Veliajt para publikut; gjestikulacionet e tij para gjyqtarëve do të jenë shumë domethënëse, ndërsa aspekti i dytë është ai ligjor vendimi që do të marrë Gjykata Kushtetuese për të ardhmen e Bashkisë së Tiranës.
Pjesë nga biseda:
Borakaj: Për çfarë keni më shumë kuriozitet për nesër në GJK?
Hasimja: Kam kureshtje njerëzore, për të parë se si do të qaset, si do të sillet, si do të komunikojë. Është tjetër gjë se si do të flasë në letra dhe tjetër gjë se si do të flasë në kamera. Aty sheh gjuhën e trupit, sheh çfarë ka ndodhur, kjo është kureshtja njerëzore. Tjetra është vendimi që do të marrë GJK.