Këtë fundjavë hyn në fuqi orari dimëror i fluturimeve për vitin 2025/26. Nga Aeroporti Ndërkombëtar i Shkupit do të ketë lidhje me 49 destinacione të rregullta të shërbyera nga 17 kompani ajrore, si dhe 13 destinacione çarter të shërbyera nga një kompani ajrore.
Nga Aeroporti “Shën Apostull Pali” në Ohër janë planifikuar pesë destinacione, të shërbyera nga tre kompani ajrore, informuan për MIA-n nga TAV Maqedoni, koncesioner i aeroporteve të Maqedonisë së Veriut.
Dy aeroportet e Maqedonisë së Veriut do të lidhen me 10 destinacione të reja në sezonin dimëror, që do të zgjasë deri në fund të marsit të vitit të ardhshëm.
Nëntë prej tyre do të operohen nga kompania ajrore Wizz Air, me subvencione nga Qeveria. Bëhet fjalë për fluturime nga Shkupi për në Bari dhe Stokholm, të cilat do të fillojnë më 27 të këtij muaji, dhe në të njëjtën datë do të fillojë edhe linja ajrore nga Ohri për në Bazel.
Më 28 tetor, kryeqyteti do të lidhet për herë të parë me Madridin, i cili është një nga destinacionet më të dëshiruara nga pasagjerët tanë. Po atë ditë, linja për në Larnaka do të kthehet në orarin e fluturimeve. Nga 15 dhjetori, Shkupi do të lidhet për herë të parë me Pragën, dhe do të kthehet edhe linja për në Këln.
Nga 30 marsi 2026, dy aeroportet do të lidhen me tre destinacione të reja. Nga Aeroporti Ndërkombëtar i Shkupit, Wizz Air po rikthen linjën e saj të rregullt për në Budapest, dhe po atë ditë kompania ajrore po hap një destinacion të ri pushimesh në Itali – Napoli, një destinacion për të cilin presim kërkesë shumë të lartë.
Më 30 mars 2026, Aeroporti Shën Apostull Pali i Ohrit do të lidhet me Milanon. Destinacioni i dhjetë i ri është linja nga Shkupi në Gjenevë, të cilën EasyJet do ta rikthejë më 3 nëntor.