Kërkesa e opozitës për shkarkimin e Presidentit të Republikës, Bajram Begaj, me pretendimin se ka shkelur Kushtetutën duke dhënë mësim në Akademinë e Forcave të Armatosura, ka qenë tema e diskutimit në Quo Vadis të moderatores Pranvera Borakaj në Vizion Plus këtë të enjte.
I ftuar në studio, juristi Alfred Balla ka deklaruar se është krenari që një President Republike të japë edhe mësim.
Ndërsa ish-deputeti Enkelejd Alibeaj e cilësoi qesharake akuzat e PD, duke theksuar se nuk ka më mirë se një President të japë mësim.
Sipas Alibeajt, Begaj nuk duhet të jetë president, por jo për akuzat e opozitës.
Pjesë nga biseda:
Borakaj: A qëndrojnë akuzat e opozitës ndaj Presidentit?
Balla: Unë kam qenë shumë vite deklarues, mos kanë të bëjnë për vitin 2022.
Borakaj: Po deri në fund.
Balla: Ajo mund të jetë edhe ndonjë e ardhur para se ai të zgjidhej.
Borakaj: Tjetra nga Akademia e FA.
Balla: Mund të ketë mësimdhënie.
Borakaj: Mund të japë mësimdhënie Presidenti?
Balla: Është nder që të japë presidenti mësim të hapur.
Borakaj: Në 2024 është në nivelin e 639 mijë lekëve, dhe në vitin 2022 është në vlerën e 1.8 milionë lekëve. A është morale dhe ligjore që Presidenti të japë mësim në Akademinë e FA?
Balla: Ligji nuk e lejon.
Alibeaj: Këtu jemi mazhoren dhe njerëz civilë, duhet të na karakterizojë një gjë, mos të na marrë marrëzia e turmave. Pse e them këtë? E them për faktin që kam parë dje edhe sot një vrull, një zell, e gjetëm fajtorin, ky është Bajram Begaj. Fillojmë tani që duhet të gjejmë ato 5 qindarkat.
Kola: Është çështje principi.
Alibeaj: Po të jetë për princip, Begaj nuk duhet të jetë President, por jo për këto arsye. Për atë dekretimin në kapërcim të Kushtetutës, për të cilën ai është i mandatuar të jetë diga e parë e Kushtetutës, dhe e dyta për faktin se është dita e 16 sot që Presidenti nuk organizon ceremoninë e betimit të gjyqtarit. Pse e bën këtë?
Kola: Pse e bën këtë?
Alibeaj: Asnjë arsye. Mosveprim total. Është një Gjykatë që duhen 9 anëtarë, ka vetëm 8-të. Ky është dëm i madh që Presidenti duhet të mbajë përgjegjësi deri në shkarkim. Çfarë ka bërë Begaj? Ka dhënë mësim dhe ka marrë ca para. Sa mirë që kemi një President që i deklaron të ardhurat e veta te ILDKP. Ne e dimë fare mirë se çfarë mase korruptive ka klasa politike, ndaj unë them më mirë një President i varfër dhe nuk është turp, sesa një President hajdut që nuk do t’i deklaronte.
Borakaj: Është legjitime?
Alibeaj: Anëtarët e GJK, deputetët, KLGJ, KLP japin mësim, sepse mësimdhënia nuk është ende mëkat.
Borakaj: E kanë të specifikuar ata që i vetmi aktivitet është mësimdhënia?
Alibeaj: Edhe Presidenti e ka. Ja pse nuk i ndalohet? Nuk kemi një ligj për Presidentin ne. Mësimdhënia kuptohet, akademizmi kuptohet.
Kola: A duhet ta kishte pritur Gjykatën Kushtetuese?
Alibeaj: Marrëzia sociale dhe publike është kjo, gjetëm fajtorin Bajram Begaj. E gjetëm të zotin dhe i bien të gjithë. E dini ç’po bëjnë në këtë rast? Sepse autori i të gjitha këtyre nuk është në presidencë, është në Kryeministri.
Kola: Nuk e faktojmë dot?
Alibeaj: Si nuk e faktoni, ju jeni gazetarë. Ishte Edi Rama një ditë të bukur, mblodhi këshillin Bashkiak në seli të partisë, i bëri rreshtore, u dha dhe se çfarë duhet të votonin dhe detyroi edhe Bajram Begajn të nxirrte dekretin. Pse Begaj u detyrua të shkonte pas vullnetit? Sepse prej 2008-ës sistemi ka bërë që të kemi një President kukull.