Çdo biznes që ka një ide të re në fushën e teknologjisë do të asistohet nga qeveria.
Në forumin e investimeve BE-Ballkani Perëndimor, Kryeministri Edi Rama lajmëroi se çdo inovator do të ketë mundësinë të shfryëzojnë të dhënat e institucioneve.
“Kemi rënë dakord brenda nesh të çojmë para procesin, duke hapur dyert e qeverisë për të gjithë inovatorët dhe duke krijuar një hapësirë të përbashkët me bërthamë agjencinë e ekselencës, që e kemi krijuar para pak kohe, të cilën do ta vëmë në dispozicionin tuaj dhe të gjithë novatorëve. Duam që start up, inovatorët të kenë mundësi të aksesojnë institucionet dhe të kenë mundësi të shohin nga afër problematikat dhe të shfrytëzojnë të dhënat e tyre, të shfrytëzojnë atë brumë që është baza e zgjidhjeve përmes IA dhe krijimit të modeleve të IA”, tha Rama.
Shefi i ekzekutivit sqaroi dhe planet për krijimin e një akseleratori, në mbështetje të ministres virtuale Diella që do t’i mundësojë institucioneve më tepër mjete të inteligjencës artificiale.
“Do prodhojmë produkte të reja, ne kemi sfidën të krijojmë akslerator në mbështetje të ministres sonë AI, akselerator që do të bazohet tek ju, tek kapitali njerëzor që ne kemi brenda AKSH-it, apo agjencisë së ekselencës dhe më këtë sinergji do të mundohemi që çdo njërit nga institucionet qendrore ti zgjerojmë trurin me IA”, tha Rama.
Në aktivitet, 161 pjesëmarrës nga i gjithë Ballkani Perëndimor dhe diaspora, prezantuan projektet e tyre me synim zhvillimin e zgjidhjeve konkrete të bazuara në inteligjencën artificiale për sfida reale shoqërore./vizionplus.tv