Kreu i Partisë Demokratike, Sali Berisha, ka reaguar ashpër ndaj mënyrës se si u zhvillua seanca parlamentare e kaluar, gjatë së cilës qeveria miratoi pa debat programin qeverisës. Në një deklaratë për mediat, Berisha e cilësoi atë si një nga ngjarjet më të turpshme dhe më të paprecedenta në historinë e Kuvendit të Shqipërisë.
“Seanca e kaluar duhet të hidhet në koshin e plehrave. Ajo do të mbetet si procesverbali më i turpshëm në historinë e parlamentit shqiptar. Ky turp do të ndjekë ata që organizuan një seancë të pashembullt, pa debat, pa transparencë, vetëm për të mbuluar skandalin e 18 rasteve ‘Erion Veliaj’,” u shpreh Berisha.
Sipas tij, zhvillimi i seancës në këtë formë përfaqëson një rekord negativ jo vetëm për Shqipërinë, por edhe për parlamentarizmin evropian.
“Nuk mund t’ia bësh vendit tënd këtë që bënë ata , një grup i papërgjegjshëm që, nga frika, kërkoi të kalojë një program pa asnjë diskutim dhe pa votim të vërtetë. Shënove rekordin më të zi në historinë e parlamentarizmit evropian,” deklaroi ish-kryeministri.
Berisha kërkoi që seanca të rikthehet dhe të zhvillohet sërish me transparencë dhe sipas rregullores parlamentare, duke shtuar se nëse ka deputetë që nuk përballojnë debatin, “le të largohen”.
/vizionplus.tv