Skuadra e Istogut ka vazhduar dominimin në hendbollin kosovar, duke u shpallur fituese e Superkupës së Kosovës në konkurrencën e femrave.
Kjo është hera e tretë që istogaset e fitojnë këtë trofe nga gjithsej katër edicione të zhvilluara deri më tani.
Në finalen e luajtur të shtunën në palestrën “Bill Clinton” në Ferizaj, Istogu triumfoi ndaj skuadrës vendase Ferizaj me rezultat bindës 39:31.
Istogaset ishin vazhdimisht në epërsi gjatë gjithë ndeshjes, duke mos e lënë asnjëherë të rrezikohej fitorja e tyre.
Dijana Ujkiq dhe Joneide Balo Olikaka ishin lojtaret më të dalluara me nga nëntë gola secila, ndërsa Tainara Luna Goncalves realizoi shtatë. Kontribut të rëndësishëm dhanë edhe Suzana Ujkiq dhe Nihed Limem me nga pesë gola.
Te Ferizaj, më efikasja ishte Elsa Kongjeli me nëntë gola, e ndjekur nga Sevdanur Ozkan me shtatë, ndërsa Fetane Uzunlar, Luljeta Sopjani dhe Lorena Matarova realizuan nga katër gola secila.
Me këtë trofe, Istogu konfirmon edhe një herë statusin si skuadra më e fortë në hendbollin kosovar, duke qenë njëkohësisht kampion në fuqi dhe fitues në fuqi i Kupës së Kosovës.