Një seri sulmesh antisemite kanë ndodhur në Australi gjatë vitit të kaluar, duke përfshirë një sulm zjarrvënieje në një kafene hebraike në Sydney në tetor dhe një tjetër në një sinagogë në Melbourne në dhjetor, ndër të tjera.
Kryeministri australian, Anthony Albanese tha në një konferencë për shtyp të martën se shërbimet e inteligjencës së vendit e kishin lidhur Iranin me të paktën dy nga incidentet, të cilat ai i përshkroi si “përpjekje për të minuar kohezionin shoqëror dhe për të mbjellë përçarje në komunitetin tonë.
Ambasadori Ahmad Sadeghi dhe tre zyrtarë të tjerë u urdhëruan nga qeveria të largoheshin nga Australia, e cila ka tërhequr diplomatët e vet nga Teherani. Irani “i hodhi poshtë kategorikisht” akuzat. Përveç kësaj, zëdhënësi i ministrisë së Jashtme iraniane shtoi se vendimi për të dëbuar ambasadorin e tyre “është për shkak të politikave të brendshme të Australisë”.
Megjithatë, shefi i Shërbimit Australian të Inteligjencës së Sigurisë (ASIO), Mike Burgess, tha se ekipet e tij kishin zbuluar lidhje “midis krimeve të dyshuara dhe komandantëve të Korpusit të Gardës Revolucionare Islamike (IRGC) të Iranit”, pas një hetimi “të kujdesshëm” që zgjati muaj.
“Ata thjesht përdorin ndërmjetës, duke përfshirë kriminelë dhe anëtarë të bandave të krimit të organizuar, për të zbatuar urdhrat e tyre ose për të drejtuar urdhrat e tyre”, u tha Burgess gazetarëve. Ai shtoi se IRGC “përdori një rrjet kompleks ndërmjetësish për të fshehur përfshirjen e saj” në sulmet ndaj Lewis Continental Kitchen në Sydney më 20 tetor dhe sinagogës Adass Israel në Melbourne më 6 dhjetor.
Agjencitë australiane të inteligjencës kanë gjetur gjithashtu prova që sugjerojnë se Irani mund të jetë pas incidenteve të tjera antisemite në Australi, ku ka pasur sulme ndaj shkollave, shtëpive, automjeteve dhe sinagogave hebraike që nga sulmi i 7 tetorit 2023 ndaj Izraelit nga Hamasi, aleat i Iranit dhe lufta pasuese në Gaza.
Gjetjet e zbuluara të martën ishin “thellësisht shqetësuese”, tha Albanese, duke i përshkruar dy incidentet si “akte të jashtëzakonshme dhe të rrezikshme agresioni”. Gjatë zjarrvënies së sinagogës, disa besimtarë u detyruan të largoheshin nga sinagoga, e cila u ndërtua nga të mbijetuarit e Holokaustit në vitet 1960.
Ministrja e Jashtme, Penny Wong tha se ishte hera e parë që nga Lufta e Dytë Botërore që Australia kishte dëbuar një ambasador, ndërsa Burgess theksoi se ambasadori nuk kishte lidhje me sulmet.
Wong tha se Australia do të vazhdonte të mbante disa marrëdhënie diplomatike me Teheranin, por kishte pezulluar aktivitetet e ambasadës së saj në Iran për sigurinë e stafit të saj.
Ajo gjithashtu u bëri thirrje australianëve të mos udhëtonin në Iran dhe u bëri thirrje qytetarëve në vend të largohen tani nëse munden dhe është e sigurt ta bëjnë këtë.
Albanese tha se qeveria e tij do ta caktojë gjithashtu IRGC-në si një organizatë terroriste.
Ambasada e Izraelit në Canberra mirëpriti veprimet kundër Iranit, me të cilin Izraeli luftoi një luftë 12-ditore në qershor.
“Regjimi iranian nuk është vetëm një kërcënim për hebrenjtë ose Izraelin, ai rrezikon të gjithë botën e lirë, përfshirë Australinë”, shkruhej në një deklaratë në X.