Mario Balotelli zbulon se “ëndrra” e tij është të luajë për Real Madridin, ndërsa ka pengje rreth Barcelonës dhe Italisë, por nuk ka ndërmend të varë këpucët ende. “Mund të kisha dhënë më shumë në do të përpiqesha.”
Nesër ai feston ditëlindjen e 35-të dhe u ul me La Gazzetta dello Sport për një intervistë të gjatë, duke parë pas në karrierën e tij.
Megjithëse është lojtar i lirë pas përfundimit të eksperiencës së tij të dështuar te Genoa, ai këmbëngul se koha e tij në futboll nuk ka përfunduar.
“Kam një ëndërr, të luaj për Real Madridin,” tha ai me një buzëqeshje.
Po realiteti?
“Thjesht po kërkoj një klub që do të ketë besim tek unë. Dua të luaj edhe dy ose tre vite të tjera. Pastaj, pas kësaj, do të shkoj të luaj me vëllain tim Enock, i cili aktualisht është te skuadra amatore Vado. Do të shohim. Në çdo rast, kam premtuar që do ta mbyll karrierën duke luajtur përkrah tij.”
Balotelli po stërvitet me stafin e tij personal të fitnesit dhe siguron se ndihet “gati” për të luajtur, megjithëse nuk i kushton shumë vëmendje botës përreth.
“Nuk shikoj futboll në TV, nuk mbaj ritmin e ngjarjeve. Jam i dashuruar me lojën e futbollit, por shumë gjëra po ndryshojnë. Shoh këta lojtarë të mëdhenj e të gjatë, por askush nuk kalon më kundërshtarët me driblim. Sot, nëse një fëmijë provon një ‘nutmeg’, qortohet.”
Balotelli ka pengje në karrierë
Duke parë pas në karrierën e tij, e cila në të vërtetë nisi me Interin, ai ka disa pendime.
“Kam kaluar një periudhë te Barcelona, që mbeti një ëndërr, por pastaj Massimo Moratti ofroi më shumë për Lumezzane, kështu që shkova te Interi. Ishte e mrekullueshme në Barcelonë, isha me vëllezërit Dos Santos, Thiago Alcantara, Bojan Krkic. Kishim liri për të luajtur. Na mësonin vetëm teknikën, si të ndalonim topin, pasimet e para, pa taktikë. Ishte një kënaqësi të shkelje në fushë.”
Balotelli nuk e përmbushi plotësisht potencialin e tij të hershëm dhe ai pranon se pjesë e fajit ishte qëndrimi i tij.
“Në përgjithësi, mund të kisha dhënë më shumë nëse do të përpiqesha. Pengu i madh është Kombëtarja, mund të kisha luajtur më shumë për Italinë. Nëse do të kisha më shumë mundësi, ndoshta do t’i isha afruar numrit të golave të Gigi Riva-s. Disa njerëz nuk donin që unë të vishja fanellën e Azzurrëve. Gjithsesi, ajo është ujë i kaluar tani.”
Edhe pse nuk është shumë i përditësuar me futbollin, Balotelli ka vënë re polemikën e Ademola Lookman, me lojtarin e Atalantës që po përpiqet të detyrojë një transferim te Interi.
“Dua të sqaroj se e kam shumë peng atë gjest në ‘San Siro’ kur hoqa fanellën e Interit. Kjo është arsyeja pse them që, me mentalitetin që kam tani, nuk do të kisha bërë atë që bëri Lookman, duke e fshirë plotësisht Atalantën nga rrjetet e tij sociale. Është e vërtetë që sot nuk ka më lojtarë ‘një-klub’, por tifozët nuk kanë faj. Ata meritojnë mirënjohje dhe respekt. Të gjithë.”