Organizatat e dala nga lufta e Ushtrisë Çlirimtare të Kosovës, ka mbajtur sot konferencë për media për të prezantuar detajet dhe informacionet për protestën e nesërme.
Në konferencë për media nënkryetari Gazmend Syla tha se tashmë janë bërë të gjitha përgatitjet për këtë protestë. Ai u bëri thirrje qytetarëve që të dalin në numër sa më të madh, shkruan gazeta online Reporteri.net.
“I ftojë të gjithë qytetarët që bashkëndjenjë me ne që bashkëndjenë me luftëtarët që padrejtësisht po gjykohen në Hagë që të marrin nesër pjesë në këtë protestë dhe të dërgojnë mesazh se bashkëluftëtarët tanë nuk janë vet dhe ne jemi gati t’u dalim në mbështetje sa herë që është nevoja”, tha Syla.
Syla u shpreh i shqetësuar për faktin se siç është raportuar, Gjykata Speciale së fundmi ka pranuar si dëshmi edhe dokumente nga institucionet serbe.
“Kategoritë e dala nga lufta e ka marrë me shqetësim të madh këtë që ka ndodh në Gjykatën Speciale, bëhet fjalë për tri organe shtetërore të Serbisë, të cilat me veprimtarinë e tyre kriminale kanë kryer krime edhe gjenocid mbi popullin tonë. Prandaj për ne është tepër e papranueshme që sot bashkësia ndërkombëtar, në këtë rast Gjykata Speciale i ka pranuar këto prova, sepse ata në një formë po i legjitimojnë këto tri institucione duke pasë parasysh faktin që tre krerët e këtyre tre institucioneve janë gjykuar dhe janë dënuar nga Gjykata Ndërkombëtare për Krime në ish-Jugosllavi.
Për ne është e papranueshme dhe kjo është edhe një motiv shtesë për me dalë në protestë por edhe në protestat tjera që do kemi pas kësaj, për të kërkuar nga faktori ndërkombëtar të mos lejojnë një gjë të tillë të ndodhë pasi aty po synohet të rishkruhet historia jonë, po cenohet të rishkruhet historia e shtetndërtimit tonë. Këtë shtet dihet që e kemi ndërtuar bashkë me bashkësinë ndërkombëtare, prandaj kjo i lëkund themelet e shtetit tonë”, tha Syla para mediave./Reporteri.net/