Kryeministri Keir Starmer ka thënë se Mbretëria e Bashkuar po punon me Jordaninë mbi planet për të dërguar ndihma në Gaza nga ajri, pasi më shumë se një e treta e deputetëve nënshkruan një letër duke i bërë thirrje qeverisë të njohë shtetin palestinez.
Të premten, Izraeli tha se do t’u lejonte vendeve të huaja të dërgonin furnizime ajrore në ditët në vijim, mes shqetësimit ndërkombëtar në rritje për kushtet humanitare në territor.
Megjithatë, OKB-ja dhe grupet e ndihmës kanë thënë vazhdimisht se dërgesat nga ajri nuk do të sjellin furnizime të mjaftueshme në Gaza, ndërsa arkat që bien mund të shkaktojnë lëndime dhe kaos në terren.
Starmer tha gjithashtu se Mbretëria e Bashkuar po “përshpejton urgjentisht përpjekjet” për të evakuuar fëmijët që kanë nevojë për ndihmë të rëndësishme mjekësore në Mbretërinë e Bashkuar për trajtim.
“Lajmi se Izraeli do t’u lejojë vendeve të hedhin ndihma nga ajri në Gaza ka ardhur shumë vonë, por ne do të bëjmë gjithçka që mundemi për të sjellë ndihma nëpërmjet kësaj rruge”, tha kryeministri.
Ai tha se Mbretëria e Bashkuar “po punonte me autoritetet jordaneze për të dërguar ndihma britanike me avionë në Gaza”.
Duke shkruar në X të premten, Staremr tha se qeveria e tij do të “përdorte çdo mundësi” për të ofruar ushqim dhe mbështetje për palestinezët, duke shtuar: “Kjo katastrofë humanitare duhet të marrë fund”.
Të shtunën, Downing Street tha se kryeministri kishte folur përsëri me presidentin francez Emmanuel Macron dhe kancelarin gjerman Friedrich Merz, pas telefonatës së tyre të premten në mbrëmje.
Të tre udhëheqësit i kërkuan Izraelit të heqë të gjitha kufizimet mbi ndihmën dhe ranë dakord se kërkoheshin “plane të fuqishme” për ta shndërruar një “armëpushim të nevojshëm urgjentisht në paqe të qëndrueshme”.