Menshir Misini: Ja e kujt është përgjegjësia
Në një kohë kur Maqedonia po përballet me një valë alarmante zjarresh që po shkatërrojnë pyje, prona dhe po rrezikojnë jetën e qytetarëve, institucionet tona, sërish po dëshmojnë paaftësi, mungesë koordinimi dhe vonesë të pajustifikueshme në reagim.
Fatkeqësitë godasin pikërisht aty ku më pak i pret – por vonesa në reagim, mungesa e përgatitjes dhe papërgjegjshmëria institucionale nuk janë të papritura, janë pasojë e qartë e një sistemi të dështuar.
Zjarret nuk njohin kufij, por përgjegjësi po.
Dhe kjo përgjegjësi bie mbi qeverinë dhe mbi të gjithë ata që për 20 vite me rradhë kanë shkatërruar çdo institucion profesional, vetëm për të kënaqur interesat e grupeve të caktuara që pushtetin e kanë parë si mundësi për pasurim personal e jo si shërbim ndaj qytetarëve.
Edhe sot, vërehet se institucionet dhe qeveria nuk reagojnë në kohë, as me kapacitete të mjaftueshme dhe as me seriozitetin që kërkon situata.
Ndonëse zjarret tashmë janë në kulm, qeveria premton se do të punësohen 400 zjarrfikës të rinj… pas tre muajve ama. Pse nuk i punësuan deri tani? Pse jo para verës kur dihet rrezikshmëria e lartë e stinës së nxehtë me zjarre që viteve të fudit dalin jashtë kontrollit? Çfarë kuptimi ka një ndërhyrje e vonuar kur dëmi është bërë? A ka nevojë Maqedonia të punësosh 400 zjarrfikës në nëntor, dhjetor, janar e shkurt kur stina e zjarreve është në korrik dhe gusht?
„Më mirë parandalo se sa sano“ është moto e emergjencave. Situata është më serioze nga sa duket, andaj apelojmë deri tek institucionet të sillen me seriozitet dhe të hidhen në veprim për të parandaluar katastrofat nga zjarret që mund të përfshijnë edhe tokat bujqësore, të mbjellurat dhe ato pak male e kodrina që kanë mbetur pa djegur. E më e keqja dhe më e parikuperueshmja, mund të marrin jetë njerëzish.
Veproni tani, lëvizni,mos digjni shpresën, besimin dhe të ardhmen!