Kuvendi i Kosovës do të mblidhet sërish sot(e shtune) m; 21 qershor në përpjekje për t’u konstituuar, për herë të 35-të që nga zgjedhjet parlamentare të mbajtura më 9 shkurt.
Seanca pritet të nisë në orën 10:30, por si në rastet e mëparshme, nuk ka sinjale të reja që të tregojnë ndonjë përparim në zhbllokimin e situatës.
Në seancën e fundit, të mbajtur para dy ditësh, dështoi për herë të 26-të formimi i komisionit për votim të fshehtë për zgjedhjen e kryeparlamentarit, propozim i kryesuesit të seancës, Avni Dehari.
Pavarësisht përpjekjeve të Lëvizjes Vetëvendosje për të futur në votim kandidaten e saj, Albulena Haxhiu, mungesa e mbështetjes nga partitë e tjera i ka pamundësuar arritjen e kuorumit.
Partitë ish opozitare; PDK, LDK, AAK dhe Lista Serbe – sërish nuk propozuan anëtarët e tyre për këtë komision, duke thelluar më tej bllokadën politike. Edhe pas dështimit të 34-të, partitë politike nuk kanë treguar ndonjë gatishmëri për ndryshim qëndrimesh.
Albulena Haxhiu ka thënë se janë në pritje të vendimit të Gjykatës Kushtetuese për interpretimin e procedurës së votimit nga i hapur në të fshehtë, duke akuzuar gjykatën për vonesa të pajustifikueshme.
Që nga mbledhja e parë më 15 prill, seancat e vazhduara po mbahen çdo 48 orë, por pa ndonjë rezultat konkret në konstituimin e legjislaturës së re.