Në kuadër të vizitës në Republikën e Austrisë, zhvillova një takim të rëndësishëm pune me Kristiane Teshl-Hofmeister, këshilltare për arsimin në Qeverinë e Austrisë.
Në fokus të bisedës sonë ishte arsimi dhe kujdesi parashkollor – shkëmbyem përvojat e të dyja vendeve dhe diskutuam mundësitë për thellimin e bashkëpunimit. Theksova angazhimin e Qeverisë sonë, e cila punon intensivisht në zgjerimin dhe modernizimin e rrjetit të institucioneve parashkollore. Qëllimi ynë është i qartë: 96% përfshirje e fëmijëve në arsimin parashkollor deri në vitin 2030. 
Shpreha interes të veçantë për modelin austriak „Kinderwelt“, i cili është shembull i qasjes inovative në fushën sociale sociale dhe të përfshirjes. Diskutuam mënyrat se si ky model mund të përshtatet edhe në vendin tonë, përmes shkëmbimit të ekspertizës, trajnimeve për edukatorë dhe realizimit të projekteve të përbashkëta.
Jam krenar që Maqedonia e Veriut dhe Austria kultivojnë marrëdhënie miqësore dhe bashkëpunim të ngushtë, veçanërisht në fushën e politikave sociale. Gjithashtu, rikujtova Memorandumin e Mirëkuptimit mes dy ministrive, i cili konkretizon bashkëpunimin tonë në fushën e mbrojtjes sociale, inkluzionit dhe mbështetjes për kategoritë e cenueshme.
Takimi kaloi në një atmosferë pozitive, me angazhime të sinqerta për avancimin e bashkëpunimit në të ardhmen. Austria mbetet partner i rëndësishëm dhe mbështetës i fuqishëm në rrugën tonë drejt Bashkimit Evropian. 