Kancelari gjerman Friedrich Merz deklaroi se gjatë takimit të tij të parë personal me presidentin amerikan Donald Trump, ka insistuar që Shtetet e Bashkuara duhet të luajnë një rol kyç në përfundimin e luftës në Ukrainë.
“Nuk prisja që presidenti të merrte vendime të reja sot, por e binda se kemi detyrim të ushtrojmë më shumë presion ndaj Rusisë,” tha Merz në një intervistë për Deutsche Welle.
Ai shtoi se Trump është i vetëdijshëm për situatën dhe po mendon për hapa të tjerë, edhe pse e pranoi se konflikti është kompleks dhe se edhe në SHBA ka debat të fortë për këtë çështje.
Sipas Merz, Trump ka mbetur i zhgënjyer që iniciativat e fundit nuk kanë sjellë përparim dhe se biseda telefonike me presidentin rus Putin nuk ka dhënë rezultate.
Megjithatë, Merz tha se kjo është një mundësi historike që SHBA dhe BE të bashkëpunojnë, jo përmes ndërhyrjes ushtarake, por përmes presionit diplomatik ndaj Moskës.
Në bisedë u trajtuan edhe çështjet e tregtisë, përfshirë tarifat.
“Trump i pëlqen tarifat, por unë po përpiqem ta bind se një marrëveshje tregtare do të ishte në dobi të dy palëve. Afati për një zgjidhje është i ngushtë, deri në fillim të korrikut,” u shpreh kancelari gjerman.
Megjithatë, Merz tha se kjo nuk është “fillimi i një miqësie vllazërore”, por i një bashkëpunimi të ngushtë mes dy vendeve.
“Jo, është një bashkëpunim shumë i ngushtë. Ne u takuam për herë të parë sot, në funksionet tona si liderë, dhe shpresoj që do të jemi në gjendje të bashkëpunojmë ngushtë, hapur dhe si kolegë të mirë nga të dyja anët e Atlantikut”, ka deklaruar ai./DW