Tensionet mes presidentit të SHBA-së, Donald Trump, dhe miliarderit Elon Musk kanë shpërthyer publikisht të enjten, duke u kthyer në një luftë fjalësh në rrjetet sociale që secili prej tyre kontrollon.
Gjatë një takimi në Zyrën Ovale rreth orës 17:00 me orën britanike, Trump deklaroi se ishte “i zhgënjyer” nga kritikat e Musk në lidhje me projektligjin e tij të ri për taksa dhe shpenzime.
“Unë dhe Eloni kishim një marrëdhënie të shkëlqyer, nuk e di nëse do ta kemi më”, ka deklaruar ai për gazetarët.
Por reagimi i Musk ishte i menjëhershëm dhe i ashpër.
Në një postim në X, ai e akuzoi Trump për “mosmirënjohje të pastër”, duke thënë: “Pa mua, Trump do t’i kishte humbur zgjedhjet.”
Trump nuk qëndroi duarkryq. Në rrjetin e tij Truth Social, ai shkroi se Musk “po dobësohej shumë” dhe se i kishte hequr atij mandatin për automjete elektrike, që sipas tij, “askush nuk i donte”.
Ai ka shtuar se gjithashtu se do të ndërpriste subvencionet dhe kontratat qeveritare për kompanitë e Musk, për të kursyer para në buxhet.
Musk iu përgjigj kërcënimit të presidentit me një sfidë të drejtpërdrejtë: “Vazhdoni, ma bëni ditën…”. Më vonë, ai hodhi edhe një akuzë të fortë, duke pretenduar pa prova se Trump figuron në dosjet e pazbuluara për lidhjet me miliarderin e ndjerë Jeffrey Epstein.
Përplasja ndodhi vetëm një javë pasi Trump dhe Musk kishin shkëmbyer përshëndetje miqësore në Zyrën Ovale, ku presidenti i dhuroi një çelës të artë.
Ndërkohë që Trump tentoi ta minimizonte konfliktin duke thënë për Politico se “gjithçka është në rregull”, tensionet nuk kaluan pa pasoja.
Tesla pësoi një rënie të ndjeshme të aksioneve me 14%, ndërsa SpaceX për pak sa nuk ndaloi një projekt të madh hapësinor.
Ndihmësit e presidentit, sipas Politico-s, kanë paralajmëruar një bisedë telefonike mes Trump dhe Musk për të qetësuar gjakrat. Por sipas vëzhguesve, një nga aleancat më të forta mes biznesit dhe politikës në Uashington është tashmë në krizë të thellë.
Jeffrey Epstein ishte një abuzues seksual i dënuar, i cili ndërroi jetë në burg në vitin 2019, dhe dosjet që lidhen me të përmbajnë emra të figurave të fuqishme botërore, por shumë prej tyre ende nuk janë bërë publike./BBC