Stuhitë e forta në jug të Gjermanisë detyruan një fluturim të Ryanair të bëjë një ulje emergjente mbrëmjen e së mërkurës, pasi turbulencat e forta plagosën nëntë persona në bord, njoftoi policia gjermane të enjten.
Fluturimi, që udhëtonte nga Berlini drejt Milanos me 179 pasagjerë dhe 6 anëtarë ekuipazhi, hasi turbulenca kaq të forta rreth orës 20:30, sa piloti u detyrua të bëjë një ulje të paplanifikuar në aeroportin e Memmingenit në Bavari.
Tetë pasagjerë dhe një anëtar ekuipazhi u plagosën.
Tre persona u dërguan në spital në Memmingen për trajtim, ndërsa të tjerët morën ndihmë jashtë spitalore dhe u liruan.
Autoritetet nuk lejuan që avioni të vazhdonte fluturimin, ndërsa kompania ajrore organizoi transport me autobus për pasagjerët. Milano ndodhet rreth 380 kilometra në jug të Memmingenit.
Në pjesë të tjera të rajonit, stuhitë dëmtuan disa shtëpi në Ulm, në landin Baden-Württemberg, sipas agjencisë gjermane të lajmeve dpa.
Në lagjen Donaustetten, erërat e forta shkaktuan dëmtime të çative të disa shtëpive radhë, të cilat u bënë të pabanuara, por nuk u raportuan të plagosur.
Zyrtarët e zjarrfikësve dyshojnë se dëmet mund të jenë shkaktuar nga një tornado i vogël ose një kolovajë uji. Shërbimi meteorologjik gjerman (DWD) po heton këtë ngjarje, sipas dpa.
Telefonata emergjente për shkak të stuhive erdhën edhe nga zona të tjera në jug të Gjermanisë, ku dëmet kryesisht ishin pemë të rrëzuara dhe bodrume të përmbytura.
DWD paralajmëroi për stuhi të tjera të enjten, me breshër, erëra të forta dhe reshje të dendura lokale./ABCnews