Agjencia e Ushqimit dhe Veterinarisë (AUV), ka njoftuar se është ndaluar përkohësisht importi i deleve dhe dhive nga qarku i Shkodrës dhe Kukësit në Shqipëri, për shkak të shpërthimit të sëmundjes ngjitëse të murtajës së bagëtive të imta.
Sipas AUV-së, autoritetet kufitare të Kosovës do të shtojnë kontrollet në të gjitha pikat kufitare me Shqipërinë, me qëllim parandalimin e përhapjes së kësaj sëmundjeje në territorin e Kosovës.
“Agjencia e Ushqimit dhe Veterinarisë vendosë masë ndalese të pakohshme, për import të ruminantëve të vegjël Dele dhe Dhi nga regjioni i Shkodrës dhe Kukësit në Shqipëri. Pas lajmërimit për konfirmim të shpërthimit të sëmundjes PPR (Peste des Petits Ruminants) tek kafshët e llojit të dhisë në Qarkun e Shkodrës në Republikën e Shqipërisë. Autoritetet kufitare do të shtojnë masat e kontrollit në të gjitha pikat kufitare me Shqipërinë, me qëllim parandalimin e futjes së kësaj sëmundjeje në territorin e Republikës së Kosovës”, thuhet në njoftim.
Murtaja e deleve dhe dhive, e njohur me emrin shkencor Peste des petits ruminants (PPR), prek kryesisht kafshët ripërtypëse të vogla si delet dhe dhitë.
Sëmundja përhapet përmes kontaktit të drejtpërdrejtë, ku burim infeksioni janë sekrecionet dhe jashtëqitjet e kafshëve të sëmura.
AUV ka sqaruar se kjo sëmundje nuk është zoonotike, që do të thotë se nuk transmetohet te njerëzit dhe nuk paraqet rrezik për shëndetin publik.
“Murtaja e Ruminantëve të Vegjël nuk është sëmundje zoonotike, pra nuk transmetohet tek njerëzit dhe nuk paraqet asnjë rrezik për shëndetin publik. AUV në bashkëpunim me autoritetet tjera, do të ndjek situatës me seriozitet dhe përveç masave paraprake preventive do të informojë fermerët dhe publikun në mënyrë të vazhdueshme për çdo ndryshim të situatës”, thuhet në njoftim.