Deputetët e zgjedhur do të mblidhen sërish këtë të enjte në orën 11:00 për ta vazhduar për herë të 27-të seancën konstituive të Kuvendit, në përpjekje për të konstituuar përfundimisht përbërjen e re parlamentare të dalë nga zgjedhjet e parakohshme të 9 shkurtit.
Procesi ka ngecur që prej 15 prillit te zgjedhja e kryetarit të Kuvendit, pasi kandidatja e Vetëvendosjes, Albulena Haxhiu, nuk ka arritur të sigurojë votat e nevojshme në disa tentativa radhazi.
Propozimi i kryesuesit të seancës, Avni Dehari, për mbajtjen e një votimi të fshehtë, është refuzuar vazhdimisht nga partitë opozitare – PDK, LDK, AAK dhe Lista Serbe – të cilat nuk kanë pranuar të propozojnë përfaqësues për formimin e komisionit që do të mbikëqyrte votimin.
Për më tepër, çështja e kushtetutshmërisë së këtij votimi është dërguar në Gjykatën Kushtetuese, ku partitë opozitare kanë kërkuar edhe pezullimin e seancave deri në një vendim të qartë nga gjykata.
Ndryshe nga herët e kaluara, kësaj radhe vazhdimi i seancës është caktuar vetëm pas 24 orësh, e jo pas 48 orësh, për të shmangur mbajtjen e saj të premten, kur festohet Bajrami.