Dogana e Kosovës ka parandaluar një tentim mashtrimi lidhur me origjinën e produkteve, duke ndaluar importin e mbi 130 tonë pleh kimik që u tentua të futet në vend duke u prezantuar si me origjinë nga Serbia, ndërkohë që në fakt vjen nga Federata Ruse.
Sipas njoftimit të Doganës, subjekti ekonomik që tentoi këtë import kishte marrë më parë një përgjigje negative për shkak të sanksioneve ndërkombëtare ndaj Rusisë, por megjithatë vazhdoi me përpjekjet për të manipuluar origjinën e mallrave duke i ambalazhuar në thasë me emërtimin e një prodhuesi serb.
Falë ndërhyrjes së shpejtë, Dogana ndaloi hyrjen e këtyre dërgesave në territorin e Republikës së Kosovës dhe me Aktvendim të kundërvajtjes është urdhëruar kthimi i menjëhershëm i mallrave jashtë Kosovës.