Presidenti i Turqisë, Recep Tayyip Erdogan, ka deklaruar se nuk ka ndërmend të kandidojë sërish për president në vitin 2028.
Ai ka theksuar se qëllimi i tij është forcimi i pozitës së Turqisë dhe miratimi i një Kushtetute të re, më demokratike dhe më në përputhje me kohën.
“Nuk kam asnjë qëllim të kandidoj sërish. Qëllimi ynë i vetëm është të rrisim reputacionin e vendit tonë. Turqia po ndryshon, bota po ndryshon. A mendoni se në një botë kaq dinamike mund të ecim përpara me një Kushtetutë të krijuar në kohën e grusht shtetit, që ende mban erën e mentalitetit të puçistëve? Turqia nuk mund të ecë më me një Kushtetutë të tillë. Na duhet një Kushtetutë e propozuar nga civilët, jo nga puçistët”, ka deklaruar Erdogan, raporton BBC.
Kushtetuta aktuale e Turqisë është miratuar në vitin 1982, pas grusht shtetit ushtarak të vitit 1980.
Edhe pse është ndryshuar disa herë, kritikohet se mban ende frymën autoritare të asaj periudhe.
Opozita turke, megjithatë, është skeptike dhe beson se propozimet për ndryshime kushtetuese nga ana e Erdoganit synojnë më shumë forcimin e pushtetit të tij sesa demokratizimin e vendit.
Vendimi i Erdoganit për të mos kandiduar më mund të sjellë ndryshime të mëdha në politikën turke, duke hapur garën për udhëheqje të re në zgjedhjet e vitit 2028.
Ai aktualisht është në mandatin e tretë si president, që përfundon pas tre vjetësh.