UEFA ka vendosur që organizatorët e Kampionatit Evropian 2028 – Anglia, Irlanda, Skocia dhe Uellsi, nuk do të përfitojnë kualifikim automatik për në fazën finale të turneut, por do të duhet të kalojnë përmes kualifikimeve.
Megjithatë, për ta garantuar pjesëmarrjen, do të rezervohen dy vende në rast se ndonjë nga këto skuadra nuk arrin të kualifikohet direkt.
Ky vendim është marrë nga Komiteti Ekzekutiv i UEFA në Bilbao, para finales së Europa League. Në edicionet e mëparshme, organizatorët kanë pasur kualifikim automatik, përveç turneut të vitit 2020, i cili ishte zhvilluar në mënyrë të shpërndarë në njëmbëdhjetë qytete të ndryshme të Evropës.
Organizatorët do të hidhen në grupe të ndryshme, ku dymbëdhjetë fitues grupesh dhe tetë skuadrat më të mira në vend të dytë (gjithsej njëzet skuadra) do të kalojnë direkt në fazën finale, që do të përfshijë njëzet e katër ekipe.
UEFA ka njoftuar se dy vende do t’i rezervohen dy organizatorëve më të mirë që nuk kualifikohen si fitues grupe apo si më të mirat e vendit të dytë pas fazës së grupeve të kualifikimeve.
Vendet e mbetura do të përcaktohen përmes ndeshjeve “Play off” midis skuadrave që kanë dalë të dyta në grupe dhe fituesve më të mirë të Nations League që nuk janë kualifikuar.
Euro 2028 do të zhvillohet në nëntë stadiume në Mbretërinë e Bashkuar dhe Irlandë.