Shqipëria i mbyll përgatitjet, gjithçka gati për ndeshjen e parë ndaj Portugalisë
Kombëtarja shqiptare U-17 është gati për ndeshjen e parë historike në Kampionatin Europian U-17 kundër Portugalisë.
Ekipi Kuqezi i mbylli pasditen e djeshme përgatitjet. Të gjithë lojtarët, nën urdhrat e trajnerit Andrea Tedesco, u stërvitën normalisht dhe janë të gatshëm për sfidën me Portugalinë.
Ndeshja e parë e Grupit A, Shqipëri – Portugali do të zhvillohet sonte në stadiumin “Arena Kombëtare” në orën 18:00.
Përballja tjetër e Grupit A, Gjermani – Francë, luhet po ashtu sot në stadiumin “Elbasan Arena” në orën 20:30.
Biletat për ndeshjet e Kampionatit Europian U-17 vazhdojnë të shiten online në ebileta.al, njofton Federata Shqiptare e Futbollit.
Në “Arenën Kombëtare” pritet një atmosferë shumë e zjarrtë për ndeshjen e parë të Shqipërisë, ku përpara fillimit të takimit do të zhvillohet edhe ceremonia zyrtare e hapjes së Kampionatit Europian U-17 “Shqipëri 2025”.