Lëvizja Vetëvendosje ka reaguar ndaj vendimit të Panelit Zgjedhor për Ankesa dhe Parashtresa (PZAP), i cili ka refuzuar kërkesën e saj për përsëritjen e votimit me postë.
Sipas LVV-së, PZAP-ja ka vepruar në mënyrë të padrejtë dhe në kundërshtim me ligjin, “duke pretenduar se ankesa është dorëzuar jashtë afatit”.
Në një reagim të publikuar në Facebook, Vetëvendosje ka akuzuar PZAP-në për ndryshimin e afateve të ankesave me qëllim që të shmangë vendimin për rivotim.
Sipas VV-së, ky institucion ka vepruar në kundërshtim me Ligjin për Zgjedhjet e Përgjithshme dhe rregullat e Komisionit Qendror të Zgjedhjeve (KQZ).
“Njoftimi i sotëm nga ana e PZAP-së se ankesa jonë për anulimin e fletëvotimeve të dërguara me postë dhe rivotimin përmes postës është e paafatshme, është pozicion arbitrar dhe i pashpjegueshëm i PZAP. Vendimi në fjalë nuk respekton njoftimin zyrtar të KQZ për momentin e përfundimit të të gjitha numërimeve në QNR dhe kështu bie ndesh me Ligjin për Zgjedhjet e Përgjithshme, rregullat e KQZ-së, si dhe me praktikat e deritanishme të parashtrimit e shqyrtimit të ankesave për cënim të procesit zgjedhor”, thuhet nga ana e VV-së.
Sipas Vetëvendosjes, PZAP-ja po përpiqet t’i shmanget përgjegjësisë për të mbrojtur integritetin e procesit zgjedhor.
“Justifikimi i PZAP-së se kinse ankesa është e pasafatshme, është qartazi tendencë për t’i ikur përgjegjësisë institucionale e ligjore për të mbrojtur integritetin e procesit zgjedhor. Shkeljet e shumta e manipulimi flagrant i procesit të votimit përmes postës nga ana e LDK-së nuk mund të anashkalohet”, thuhet tutje në reagimin e VV-së.
Sa i përket afatit për dorëzimin e ankesave, Vetëvendosje ka sqaruar se afati i fundit ka qenë më 7 mars në orën 21:00 dhe se ankesa e tyre është dorëzuar bashkë me provat përkatëse në orën 20:20, pra sipas tyre, brenda afatit ligjor.