“Ka komuniku avokati edhe me Dardanin në atë kohë me z. Dardanin, më fal nuk e meriton me i thënë Zotëri por nejse…Ai është i ulët, më fal që po e them por ai është njeriu më i ulët që e kam takuar për 25 vjet”, ka thënë Syzana Gashi – Durmishi – Përgjegjëse për Siguri dhe Shëndet në Punë në KMDK.
Këto deklarata dhe fjalia “Krejt janë rrena çka ka shkru për mua” janë cilësuar fyerje, nxitje e urrejtjes, linçim dhe denigrim publik i eprorit, në këtë rast, Dardan Velijajt, kryeshefit Ekzekutiv të Kompanisë për Menaxhimin e Deponive në Kosovë.
Deklaratat, Syzana Gashi-Durmishi, Përgjegjëse për Siguri dhe Shëndet në Punë në këtë kompani, i bëri më 24 janar 2025 në emisionin Debat Plus, ku kishte ngritur pretendime për padrejtësitë që ajo thoshte se i janë bërë nga kryeshefi Velija dhe Lule Pashku, tash sekretare.
Mohim i mundësisë për shkollim, mohim i pushimit vjetor e mjekësor, mohim i pushimit për arsye të qëndrushme familjare e vërejtje tendencioze pa asnjë bazë, këto ishin padrejtësitë që ajo thoshte se ka përjetuar për më shumë se dy vite.
Intervista në Debat Plus, Gashi-Durmishit i ka kushtuar me suspendim të përkohshëm nga puna, me 50% pagë deri në një njoftim tjetër.
Suspendimi i datës 20 shkurt bazohet në shkeljet që pretendohet se i janë bërë neneve 8-9 të rregullores për Procedurën Penale.
Duke e cituar intervistën e saj në Debat Plus, suspendimi që mbanë nënshkrimin e Kryeshefit Dardan Velija ka listuar këto pretendime: kanosje ndaj eprorit dhe frikësim i organeve disiplinore, deklarata të rreme dhe shpifje ndaj menaxhmentit, organizim të veprimtarisë politike në ndërmarrje, përfshirë pretendimet e përmendura në fillim.
Me asnjërin prej arsyetimeve në aktin e suspendimit nuk pajtohet Syzana Gashi-Durmishi duke e vënë në dyshim madje edhe vetë rregulloren se ku është bazuar suspendimi.
Ajo shkarkimin e cilëson të padrejtë, tendencë për të cënuar lirinë e shprehjes, dhe beson se mund të jetë edhe hakmarrje për publikimin e padrejtësive në emisionin Debat Plus.
“Këto të gjitha janë vërtetu prej inspektoratit të punës është vendim i prerë i Inspektoratit të Punës i cili i rri mbrapa drejtësisë dhe thotë se kam të drejtë në shkollim, në pushime vjetor e mjekësore, po prap se prap ky lëshon vërejtje lëshon suspendime”, ka thënë Syzana Gashi – Durmishi – Përgjegjëse për Siguri dhe Shëndet në Punë në KMDK.
Gashi-Durmishi tregon se menjëherë pas intervistës në Debat Plus ishte në pushim mjekësor dhe në ditën e parë që ishte kthyer në vend të punës në orën 09:00 në mëngjes i ishte kërkuar të largohet nga objekti sepse ishte suspenduar.
Ajo tregon se ishte ftuar nga hetuesit, pas raportimit të rastit në Polici nga Kryeshefi, Dardan Velija, dhe ka besuar që historia aty është mbyllur.
“Të nesërmën ose të pasnesrmën nuk jam e sigurt se me avokat shkova, aty janë sqaru të gjitha, merre me mend unë kamë qenë në hetusi ose krime të rënda pse kam marr në debat plus. Pse ka dalë në televizor është shprehur Suzana edhe pse i ka përmend disa fjalë aty kërcënimë shantazhime e kolegë, nuk është e vërtetë aspak që kam kërcënu kolegë….”, ka thënë Syzana Gashi – Durmishi – Përgjegjëse për Siguri dhe Shëndet në Punë në KMDK.
Gashi-Durmishi thotë se i ka përmendur vetëm z. Dardan Velijën dhe sekretaren Lule Pashku, ndaj të cilëve i kishte shprehur pretendimet në Debat Plus.
Ajo thekson se nuk i di arsyet se pse ka arritur situata deri në këtë pikë, prandaj thotë se ka dorëzuar ankesë dhe i është drejtuar Komisionit të Vlerësimit, dhe shton se nëse është e nevojshme, betejën do të vazhdojë në të gjitha nivelet e gjykatava.
Po në debatin që Gashi-Durmishi ka dhënë versionin e saj, dhe ka hedhur akuza në drejtim të eprorit të saj, të njejtit, Dardan Velisë i është dhënë mundësia që ta ketë kohën dhe hapësirën e njejtë në intervistë, për të shpalosur të vërtetën e tij, por një gjë të tillë e ka refuzuar.
Edhe për suspendimin Velija e ka pasur rastin që të sqarohet por nuk e ka bërë, derisa Televizioni ka dërguar pyetje në drejtim të institucionit që e drejton.
Më datë 4 mars, Velija është kontaktuar përmes telefonit dhe me arsyetimin se ka shumë takime dhe nuk i ka parë as pyetjet që i kemi adresuar në adresën elektronike, puna mbeti që të shqyrtohet për datën 5 mars mundësia për intervistë. Por sërish, përgjigjet e tij kanë munguar edhe në pyetjet me shkrim, edhe në opsionin e një interviste para kamerës.