“Puna e kujdesit të papaguar, barazia gjinore në tregun e punës, paga e jetesës si një mjet për drejtësi sociale, integrimi i të drejtave sociale dhe të punës në Agjendën e Gjelbër, implikimet e Direktivës së BE-së për të drejtat e punës në Ballkanin Perëndimor” janë disa nga temat që u trajtuan në Akademinë Rajonale për Punë të Denjë në Ballkanin Perëndimor 2024.. Ky takim është mbajtur në Igalo të Malit të Zi.
Instituti për Politika Sociale “Musine Kokalari”, që e organizoi këtë akademi, tha se ajo “shërben si një platformë thelbësore për shkëmbimin e ideve, forcimin e bashkëpunimit rajonal dhe strategjinë për integrimin e të drejtave të punës në politikat më të gjera sociale dhe ekonomike”.
Në organizim ishin edhe Qendra për Politikat e Emancipimit nga Serbia, Shoqata për Siguri në Punë nga Mali i Zi dhe ZORA – Shoqata për zhvillim social, kulturor dhe kreativ nga Bosnjë e Hercegovina.
“Bashkëpunimi rajonal ndërmjet sindikatave dhe organizatave të shoqërisë civile, fushatat, grevat dhe strategjitë e negociatave për mbrojtjen e punës është parakusht për avancimin e të drejtave të punës përmes veprimit kolektiv dhe avokimit, ka nënvizuar Koalicioni Rajonal për Punë të Denjë që përfshinë 45 organizata nga rajoni i Ballkanit Perëndimor”, thuhet në njoftim.
Mbi 60 përfaqësues të sindikatave dhe organizatave të shoqërisë civile që ishin pjesmarrës, “riafirmuan përkushtimin për avancimin e të drejtave të punës përmes veprimit kolektiv dhe avokimit”, sipas institutit “Musine Kokalari”.