Për katër ditë me radhë një pjesë e shesheve të Prishtinës u është dedikuar fëmijëve.
Aty është organizuar Panairi i Librave për Fëmijë.
Pjesë e këtij panairi ka qenë edhe Shtëpia Botuese “Dukagjini”, e cila pos prezantimit të librave, edhe i shpërbleu fëmijët.
Atyre që morën pjesë në garën për shkrimin më kreativ dhe ilustrimin më të bukur, iu ndanë çmime.
Tri vendet e para fituan set të librave, puzzle dhe DUKË Cards.
“Kanë mundur të aplikojnë me ilustrime dhe me shkrime dhe krejt këta janë shpërblyer. Tema ka qenë që të bazohen në lektyra që i kemi të caktuara prej klasës së parë deri në klasën e katër e që do të vazhdojnë edhe për klasën e pestë e do të publikohen në ditët në vazhdim”, ka thënë Liridona Bytyqi – Shtëpia Botuese “Dukagjini”.
E, Dukagjini ishte adresa edhe për një dashamir të vogël të librave.
Ditën e fundit të panairit ai u furnizua me dy sosh.
“Librat që më pëlqejnë shumë janë librat që kanë më shumë faqe, më shumë kuptim edhe më shumë lexim”, ka thënë Ariot Mehmeti – Pjesëmarrës në panair.
Në Panairin e Librit për Fëmijë në Prishtinë, Shtëpia Botuese Dukagjini është prezantuar me ofertë deri në 50% zbritje në botimet për fëmijë.
Aty janë paraqitur lektyra për klasën e parë, të dytë, të tretë dhe për klasën e katërt, të cilat janë shoqëruar me aparaturë didaktike dhe me ilustrime origjinale, si dhe fjalorth me shpjegime e sqarime të nevojshme.