TV News
Kosovë

Dita e dëshmorëve të kombit shqiptar, Kurti: Jeta e tyre është e paçmueshme në të gjitha kohët

Kryeministri Albin Kurti, i ka kujtuar sot në ditën e tyre, të gjithë dëshmorët shqiptarë të rënë në të gjitha etapat e të kaluarës së kombit.

Kurti mes tjerash përmend UÇK-në duke shtuar se të rënët e saj, janë dëshmorët më të freskët në kujtesën kolektive për rrugën që kanë ndjekur.

”5 maji është dita e dëshmorëve të kombit shqiptar, të rënë kudo dhe kurdo gjatë historisë. Andaj sot i kujtojmë të gjithë dëshmorët e rënë në të gjitha etapat e së kaluarës sonë. Trofeu i synuar dhe trofeu i fituar nga dëshmorët, është liria jonë, si mundësi për vetëvendosje dhe përparim.

Dëshmorët janë dëshmi e orëve të historisë, dëshmitarë të historisë së kombit. Jeta, vepra dhe rënia e tyre përcillen si mësime dhe frymëzime ndër breza.

Çmimi i lirisë është paguar me gjakun e dëshmorëve, andaj jeta e tyre është e paçmueshme në të gjitha kohët.

Dëshmorët janë të vetmit që e kanë përfunduar dhe vulosur angazhimin e tyre për vendin, për lirinë dhe për atdheun. Ne të gjallët e sotëm dhe të brezave pasardhës, e kemi për detyrë të përditshme angazhimin dhe përpjekjen për atdheun, për lirinë dhe për vendin.

Sivjet po bëhen 25 vite nga çlirimi i Kosovës në qershor të vitit 1999. Dëshmorët e Ushtrisë Çlirimtare të Kosovës përfaqësojnë grupin e fundit të madh të të rënëve për lirinë e vendit tonë. Ata janë dëshmorët më të freskët në kujtesën tonë kolektive për rrugën që kemi ndjekur deri te liria, andaj edhe përkujtimet e nderimet tona për dëshmorët, nisin prej tyre dhe mbarojnë me ta.

Lavdi përherë dëshmorëve të kombit të rënë për liri, sot dhe për jetë e mot!”.

Lajme të ngjashme

Kurti priti krerët e koalicionit VLEN, i uroi për fitoren dhe rezultatin zgjedhor

Suad Avdiu

Zotëria i Parë për Presidenten dhe Hillary Clintonin: Kanë shkruar historinë, i kanë avancuar të drejtat e grave globalisht

Suad Avdiu

Ambasadori Hovenier takon KFOR-in amerikan, flasin për sigurinë në Kosovë