Për herë të parë në historinë e Maqedonisë, boshnjakët do të kenë kandidatin e tyre për president të vendit.
Bëhet fjalë për Mersiha Smailoviq, e cila do të jetë kandidate e Bashkimit Demokratik Boshnjak.
Mersiha Smailovic është avokate dhe aktiviste civile. Në angazhimin e saj qytetar është aktive në fushën e avokaturës për të drejtat e njeriut, diskriminimin, barazinë gjinore, të drejtat e grupeve etnike etj. Punimet e saj kërkimore mbi të drejtat e refugjatëve, islamofobinë, të drejtat e grave janë botuar në disa botime vendore dhe ndërkombëtare.
Ajo ishte e përfshirë në mënyrë aktive në misione të shumta humanitare në nivel global dhe lokal. Mersiha u diplomua në Universitetin e Sh. Kirili dhe Metodi në Fakultetin Juridik, dhe aktualisht është duke ndjekur studimet master në të Drejtën Ndërkombëtare në të njëjtin universitet. Ajo është alumne e organizatës amerikane Vital Voices, e cila u themelua nga Hillary Clinton dhe synon të edukojë dhe mbështesë gratë në politikë. Mersiha ka lindur në Shkup, është e martuar dhe nënë e dy vajzave. Po ashtu është pronare e kompanisë për shërbime financiare dhe juridike NAHLA CONSULTING, ku aktualisht punon me kohë të plotë.(INA)