Kanë dal në shitje hotelet tradicionale të Kumanovës “Kristal”, “Kumanova” dhe “KU-BA”.
Këto hotele që janë jofunksionale janë pronë e ish-kompanisë së “ Biserka A.D.”.
Ankandi publik për shitje është caktuar për datën 25 janar të këtij viti, përcjell portali Kumanovonews.
Ofrohen tre pako për çdo objekt pa çmim fillestar, por vetëm me vlerë të parashikuar.
Hotel “Kumanova” me vlerë mbi 24 milionë denarë apo mbi 400 mijë euro, hotel “Kristal” me vlerë mbi 60 milionë denarë apo 1 milion euro dhe hotel “KU-BA” me vlerë mbi 3 milionë denarë apo rreth 50 mijë euro.
Të drejtën e pjesëmarrjes në shitjen elektronike ka kushdo që paguan depozitë ose jep garanci bankare në masën 10% të vlerës së parashikuar të pronës, individualisht për çdo paketë.
“Shitja kryhet mbi bazën “shihet-blihet” pa të drejtë kundërshtimesh dhe pretendimesh shtesë.
Pas përfundimit të ankandit publik, asambleja e kreditorëve do të marrë vendimin përfundimtar nëse prona do të shitet me çmimin më të lartë të arritur.
Në Departamentin e Urbanistikës në Komunën e Kumanovës thonë se sipas Planit të Përgjithshëm Urbanistik nëse objektet shiten nuk do ta ndryshojnë qëllimin për të cilin janë ndërtuar.(INA)