Po përballemi me një zgjerim të jashtëzakonshëm të përdorimit të teknologjisë smart si celularët, laptopët dhe tabletët, që është bërë një problematikë e pranishme në çdo familje, veçanërisht tek fëmijët tanë. Shpesh në ambiente publike, nuk është e mundur të mos shohësh një fëmijë të ekspozuar për një kohë të gjatë para ekranit të një telefoni apo tableti.
Edhe pse fëmija mund të ketë zhvillim të shëndetshëm në fillim, ekspozimi i tepërt ndaj ekranit dhe përmbajtjes që përçon mund të ndikojë negativisht me kalimin e kohës. Ky fenomen është përshkruar shpesh si “autizëm i rremë.” Fëmija, në thelb, është i shëndetshëm, por për shkak të ekspozimit të vazhdueshëm ndaj një burimi të vetëm informacioni, ai mund të zhvillojë sjellje që ngjajnë me ato të autizmit.
Një nga gabimet e prindërve është që, pa dashur, i lavdërojnë këto sjellje, duke menduar se fëmija ka arritur një zhvillim të jashtëzakonshëm, si për shembull kur një fëmijë dyvjeçar flet anglisht. Kjo, në realitet, është një problem që mund të ndikojë në aftësitë e tij të zhvillimit të gjuhës dhe të ndërveprimit shoqëror.
Nëse fëmija ekspozohet vetëm ndaj përmbajtjes digjitale dhe nuk ndërvepron në mënyrë të drejtpërdrejtë me botën rreth tij, ai nuk arrin të zhvillojë komunikimin e duhur dhe mund të krijojë një mjedis të rremë rreth vetes.
Kjo çështje është e rëndësishme për prindërit, të cilët duhet të bëjnë përpjekje për të kaluar të paktën 30 minuta në ditë me fëmijët e tyre, duke luajtur ose duke komunikuar me ta. Kjo kohë e kaluar së bashku është një pasuri e vërtetë dhe kontribuon në zhvillimin e shëndetshëm të fëmijës. Një aspekt tjetër i kësaj problematike është komunikimi me prindërit.
Shpeshherë, jo të gjithë prindërit janë të gatshëm ta pranojnë se ekziston një problem me fëmijën e tyre. Jemi me fat kur kemi përballë prindër të cilët e pranojnë situatën dhe janë të gatshëm të punojnë së bashku për të ndihmuar fëmijën. Por, nga ana tjetër, ka edhe prindër që përballen me vështirësi emocionale dhe nuk e pranojnë lehtë se fëmija i tyre mund të ketë nevojë për ndihmë.
Mesazhi kryesor i imi është që, në qoftë se shohin fëmijën e tyre që po shfaq një sjellje të pazakontë, që nuk përkon realisht me moshën e vet, të mos hezitojnë të kërkojnë ndihmë prej profesionistëve të këtyre fushave.
Gazetare Abibe Qaili /Televizioni News