Ministri i Mbrojtjes, Euup Maqedonci ka njoftuar se së bashku me Komandatin e FSK-së kanë kërkuar nga strukturat përgjegjëse të Forcës së Sigurisë së Kosovës [FSK] dhe Ministrisë së Mbrojtjes që të ndërmarrin hapat e nevojshëm për zgjedhjen e sfidave për furnizimin dhe shërbimin ushqimor të personelit të FSK-së.
Maqeodonci përmes një postimi në rrjetin social “Facebook” ka shkruar se përmes këtyre veprimeve synohet minimizimi i ndikimeve negative për furnizim dhe shërbimin ushqimor, duke garantuar që situatat e tilla të mos prekin efektin dhe përformancën e FSK-së.
“Për të adresuar këto sfida të përsëritura, unë, së bashku me Komandantin e FSK-së, kemi kërkuar që strukturat përgjegjëse në Ministrinë e Mbrojtjes dhe Forcën e Sigurisë së Kosovës të ndërmarrin hapat e duhur dhe të nevojshëm për të zgjidhur sfidat lidhur me furnizimin dhe shërbimin ushqimor për personelin e FSK-së. Përmes këtyre veprimeve, synojmë të minimizojmë ndikimet negative në furnizim dhe shërbim, duke garantuar që situata të tilla të mos prekin më efektivitetin e përgjithshëm dhe performancën operacionale të personelit të FSK-së”.
Maqedonci theksoi se problemet e tilla janë shfaqur prej 2009-së dhe gjithnjë janë zhvilluar procedurat për kontrata emergjente.
“Që nga themelimi i FSK-së në vitin 2009, pothuajse çdo herë pas përfundimit të kontratave trevjeçare, si rezultat i ankesave nga operatorët ekonomikë të cilat janë adresuar në Organin Shqyrtues të Prokurimit, janë zhvilluar procedurat për lidhjen e kontratave emergjente. Vetëm nga viti 2015 e deri më tani janë dhënë 10 kontrata sipas procedurave ekstrem emergjente. Këto çështje kanë krijuar situata të jo të mira dhe probleme të vazhdueshme, duke rrezikuar integritetin e proceseve dhe që si rezultat kanë ndikuar në dëmtimin e imazhit publik të FSK-së dhe mirëqenien e pjesëtarëve të saj”, ka shkruar Maqedonci.
Maqedonci potencoi se janë të vetëdijshëm për aktet ligjore që kanë afate të caktuara kohore por që do të zbatojnë gjitha procedurat e nevojshme për rekrutimin e personelit të stafit të kuzhinave.
“Jemi të vetëdijshëm se aktet ligjore dhe nënligjore në fuqi kërkojnë afate të caktuara kohore për procesin e rekrutimit të personelit profesional për kuzhinat e FSK-së. Megjithatë, do të zbatojmë me përpikëri të gjitha procedurat ligjore të prokurimit për furnizimin me ushqim në kazermat e FSK-së. Pas hapjes së konkursit për rekrutimin e personelit të stafit të kuzhinave që e kemi bërë me datën 10 tetor, do të vazhdojmë të ndjekim hapat e nevojshëm për të siguruar që ky proces të përfundojë me sukses deri në finalizimin e plotë të rekrutimit të personelit civil të specializuar, i cili do të integrohet në kuadër të FSK-së”, ka shkruar Maqedonci.