Në sektorin privat ka të punësuar, të cilët marrin pagë mujore më të ulët se paga minimale, thonë sindikalistët. Megjithëse punojnë së paku 8 orë për 6 ditë të javës, ato i marrin në formë të honorarit, apo para në dorë. Ky fenomen pritet të ulet me subvencionimin e pagave, masë kjo e propozuar në Pakon e 9 të masave anti-krizë, në mënyrë që nga muaji mars mos të ketë pagë më të ulët se 22,500 den.
Ministria për punë dhe politikës sociale njoftoi se në Kuvend është ligji për subvencionet, gjegjësisht lirimi nga kontributet, i cili i mundëson sektorit privat që punëtorëve të tyre t’i rrisë pagat nga 3000-9000 denarë. Punëdhënësit mbështesin rritjen e pagës minimale nga marsi i këtij viti, ndërsa për një pjesë të vogël të punëdhënësve që nuk do të mund ta paguajnë pagën do t’u ndihmojë Ligji për subvencionet për rritjen e pagave, i cili parasheh mundësi për t’u liruar nga pagesa e kontributeve, thonë nga MPPS.
“Në Këshillin Socio-Ekonomik është diskutuar plani operativ i punësimit, masat dhe programet për vitin 2024, ku morën pjesë edhe punëdhënësit dhe sindikatat, në mënyrë që të vazhdojmë procedurën dhe ta miratojmë më tej në Qeveri. Është miratuar edhe rritja e pagës minimale që fillon nga muaji mars. Nga asnjë përfaqësues i Organizatave të punëdhënësve nuk është përmendur se do të kenë problem. Edhe ata si punëdhënës janë të kënaqur me këtë metodologji për rritjen e pagës minimale”, thonë nga Ministria për punë dhe politikës sociale.
Për ekspertët ekonomik sektori privat e ka humbur konkurrencën në tregun rajonal, duke mos pasur fuqi punëtorë mirë të paguar, klient kryesor e kanë shtetin për tenderë publikë. Analisti Visar Ademi tha se shteti është punëdhënësi më i madh, prandaj kompanitë e sektorit privat shkelin të drejtat e punëtorëve.
“Do t’ju jap një të dhënë që është pesimiste por tregon shumë për këtë situatë! Nga Janari 2023 deri në Janar 2024, diku afër 14 mijë të punësuar kanë marrë fletë-çregjistrimi nga sektori privat. Do të thotë këta persona nuk shohin perspektivë në firmat private në vend dhe 95% e tyre do të përfundojnë në tregun e Evropës Perëndimore si të punësuar të rinj dhe një pjesë e vogël do të punësohet në sektorin publik. Në një vend ku sektori publik përbën përqindjen më të madhe të shportës së konsumit të produkteve dhe shërbimeve, nuk ke se si mund të kesh një kriter të fortë në sektorin privat”, u shpreh Visar Ademi, Ekspert ekonomik.
Konfederata e organizatave sindikale të Maqedonisë, vazhdimisht ka shprehur revoltin për mos pagesë të duhur të të punësuarve në sektorin privat sidomos në sektorin e tekstilit. Sindikalistët shprehen të gatshëm të dalin sërish në protestë nëse nuk përmbushen kërkesat e tyre, duke hequr mundësinë e pagave nën minimalen, e cila aktualisht është 20,170 denarë dhe nga marsi rritje pritet të ketë së paku 2 mijë denarë të pagës minimale./Alsat