Ministri i Ekonomisë dhe Punës, Besar Durmishi, ka zhvilluar sot një takim me Biljana Cvetanovska Gugoska, shefen e sapoemëruar të zyrës së Fondit për Popullsi të Kombeve të Bashkuara (UNFPA) në Maqedoninë e Veriut, me të cilën ka diskutuar për thellimin e bashkëpunimit në fushën e punësimit, fuqizimit ekonomik të grave dhe përballjes me sfidat demografike.
Gjatë takimit, ministri Durmishi theksoi se ndryshimet demografike kanë ndikim të drejtpërdrejtë në tregun e punës dhe zhvillimin ekonomik të vendit, prandaj krijimi i vendeve të reja të punës, përmirësimi i kushteve të punës dhe rritja e sigurisë ekonomike për të rinjtë dhe familjet mbeten ndër prioritetet kryesore.
“Prioriteti ynë është të krijojmë më shumë mundësi punësimi, kushte më të mira pune dhe siguri më të madhe ekonomike për të rinjtë dhe familjet”, theksoi Durmishi.
Vëmendje e veçantë gjatë takimit iu kushtua rritjes së pjesëmarrjes së grave në tregun e punës, mundësive për rikualifikim profesional, si dhe krijimit të kushteve që mundësojnë një baraspeshë më të mirë ndërmjet jetës profesionale dhe asaj familjare.
Ministri Durmishi theksoi gjithashtu rëndësinë e bashkëpunimit me organizatat ndërkombëtare për hartimin dhe zbatimin e politikave që u përgjigjen nevojave reale të qytetarëve, veçanërisht të rinjve dhe grave.
Në kuadër të Programit të UNFPA-së për periudhën 2026–2030, u diskutuan mundësitë për realizimin e nismave konkrete të përbashkëta, të cilat do të kontribuojnë në ndërtimin e një tregu pune më gjithëpërfshirës dhe në krijimin e perspektivave më të mira për gjeneratat e reja.
“Vazhdojmë të ndërtojmë partneritete që sjellin përfitime konkrete për qytetarët”, përfundoi ministri Durmishi, duke riafirmuar përkushtimin për politika që nxisin punësimin, zhvillimin ekonomik dhe mirëqenien e qytetarëve.