Qytetarët në Maqedoninë e Veriut nga e enjtja do të mund t’i përdorin letërnjoftimet dhe patentë-shoferët përmes telefonit mobil, me hyrjen në përdorim të portofolit elektronik. Aplikacioni do të prezantohet zyrtarisht të mërkurën, më 28 tetor.
Ministri i Transformimit Digjital, Stefan Andonovski, tha se aplikacioni është i sigurt dhe u mundëson qytetarëve të zgjedhin se cilat të dhëna personale dëshirojnë të ndajnë.
Identifikimi do të bëhet përmes një kodi QR njëpërdorimësh, i cili skadon pas 10 deri në 15 sekondash. Kështu, qytetarët do të mund të ndajnë vetëm informacionet e nevojshme, pa zbuluar të gjitha të dhënat nga dokumentet e tyre.
Sipas ministrit, ky është hapi i parë drejt krijimit të një portofoli digjital evropian, me synimin që në të ardhmen të përfshihen edhe shërbime dhe dokumente të tjera.