Raporton:Televizioni News
Bashkëpunimi shumëvjeçar vazhdon në shërbim të brezave të rinj!
Kryetari i Odës së Zejtarëve të Republikës së Maqedonisë së Veriut, njëkohësisht sipërmarrës i Shtëpisë së Modës “Stil”, Agron Fazliji, ka zhvilluar një takim me drejtoreshën dhe profesorët e shkollës së mesme “Pero Nakov” në Kumanovë.
Takimi është zhvilluar në kuadër të bashkëpunimit me paralelet me mësim në gjuhën shqipe, me fokus të veçantë në krijimin e mundësive që nxënësit të fitojnë përvojë praktike dhe të zhvillojnë aftësitë e tyre profesionale.
Ky bashkëpunim ndërmjet sektorit të zejtarëve dhe shkollave profesionale synon që të rinjtë, krahas njohurive teorike, të kenë mundësi të njihen drejtpërdrejt me profesionin dhe kërkesat e tregut të punës.
Fazliji theksoi rëndësinë që ndërmarrjet që plotësojnë kushtet për pranimin dhe aftësimin e nxënësve të marrin përgjegjësi aktive në edukimin dhe përgatitjen e brezave të rinj.
“Dijen e përcjellim. Zejen e vazhdojmë. Të ardhmen e ndërtojmë së bashku!”, është mesazhi i këtij bashkëpunimi.
Falënderim i është shprehur drejtoreshës dhe profesorëve të shkollës “Pero Nakov” për bashkëpunimin dhe përkushtimin e vazhdueshëm në përgatitjen profesionale të nxënësve.