Sektori për parandalim pranë SPB Kumanovë është pjesë e fushatës ndërkombëtare “Focus on the Road”, e cila zhvillohet nga 5 deri më 11 tetor në 34 vende evropiane.
Fokusi i fushatës janë të gjithë drejtuesit e automjeteve dhe këmbësorët që gjatë pjesëmarrjes në komunikacion përdorin telefona celularë, pajisje elektronike apo kufje, duke rrezikuar sigurinë dhe jetën e tyre, por edhe të pjesëmarrësve të tjerë në trafik.
Aktiviteti i sotëm parandalues ishte i drejtuar ndaj drejtuesve të automjeteve që përdorin telefonin celular gjatë drejtimit të automjetit, si dhe këmbësorëve që kalojnë në vendkalimet për këmbësorë duke përdorur kufje. Përdorimi i këtyre pajisjeve ul përqendrimin dhe vëmendjen ndaj rrugës dhe mund të çojë në aksidente me pasoja të rënda.
Shefja e Seksionit për Parandalim, magjistrja Lile Mladenovska, u bëri apel të gjithë drejtuesve të automjeteve dhe këmbësorëve që gjatë pjesëmarrjes në komunikacion t’i respektojnë me përpikëri kufizimet ligjore, të sillen me përgjegjësi dhe të respektojnë Ligjin për Sigurinë në Komunikacion.
Mladenovska theksoi se edhe në ditët në vijim, deri në përfundimin e aksionit ndërkombëtar, do të ndërmerren masa ligjore ndaj të gjithë drejtuesve dhe këmbësorëve të papërgjegjshëm që nuk i respektojnë rregullat e komunikacionit dhe rrezikojnë jetën e tyre dhe të pjesëmarrësve të tjerë duke përdorur telefona celularë, kufje apo pajisje të tjera elektronike gjatë pjesëmarrjes në trafik.
