Kush është Stojan Çifligaroski, biznesmeni 44-vjeçar i njohur për tenderët në vlerë prej miliona eurosh me REK „Bitola“, i cili pas pothuajse tre vitesh i paarritshëm për organet e ndjekjes u kthye në Maqedoni dhe më 22 shtator u arrestua në pikën kufitare „Shën Naum“? Çifligaroski ishte në kërkim me fletarrestim qendror me urdhër të Prokurorisë Themelore Publike për Ndjekjen e Krimit të Organizuar dhe Korrupsionit, për shkak të hetimit për rastin „Zinxhiri“.
Sipas informacioneve që Ministria e Punëve të Brendshme i ka konfirmuar për „Fokus“, Çifligaroski, i cili është nga Ohri dhe jeton në Manastir, është privuar nga liria gjatë hyrjes në vend.
Deri tani nuk ka shpjegim zyrtar se pse ka vendosur të kthehet pikërisht tani. Gjatë viteve të fundit, në media është raportuar se me shumë gjasë ka qëndruar në Shtetet e Bashkuara të Amerikës, por vendndodhja e tij e saktë nuk është konfirmuar zyrtarisht.
Çifligaroski u bë i njohur për publikun si pronar i kompanisë „SV Invest“, e cila për një periudhë të shkurtër u shndërrua në një prej kompanive më të rëndësishme për kryerjen e punëve për REK „Bitola“.
Sipas një hulumtimi të mëparshëm të „Telma“, kompania në mars të vitit 2018 kishte marrë një kontratë në vlerë prej rreth 345 mijë eurosh për pastrimin e shiritave transportues të qymyrit, përmes një procedure negociuese pa shpallje paraprake të njoftimit. Në tetor të po atij viti pasoi edhe një kontratë tjetër me vlerë të ngjashme.
Gjatë gjashtë muajve të ardhshëm, „SV Invest“ mori edhe tri kontrata të tjera për angazhimin e mekanizimit ndihmës dhe pastrimin e sistemeve të transportit, me vlerë totale prej rreth dy milionë eurosh. Deri në fund të vitit 2020, vlera e tenderëve që kompania kishte marrë nga REK „Bitola“, sipas përllogaritjeve të mediave, kishte arritur në 5.5 deri në 5.7 milionë euro.
Paralelisht me kontratat, rritej edhe kompania. Nga vetëm dy të punësuar në vitin 2017, „SV Invest“ arriti në rreth 150 të punësuar në vitin 2018 dhe në 280 në vitin 2019. Po atë vit, kompania kishte deklaruar fitim prej rreth 155 milionë denarësh, përkatësisht rreth 2.5 milionë euro.
Rritja e shpejtë e biznesit shumë shpejt u zëvendësua me rënie financiare. Në vitin 2020, kompania kishte deklaruar humbje në vlerë të ngjashme, ndërsa në vitin 2021 përfundoi në falimentim. Sipas informacioneve të atëhershme në media, detyrimet e raportuara të kompanisë arrinin në rreth 25 milionë euro.
Emri i Çifligaroskës u rikthye në qendër të vëmendjes më 30 tetor 2023, kur u zhvillua aksioni policor „Zinxhiri“. Ai u identifikua si një prej personave të dyshuar për organizimin e një grupi që, sipas hetimit, përmes faturave fiktive dhe transaksioneve ndërmjet disa kompanive shmangte pagesën e tatimeve dhe pastronte para.
Në aktakuzën fillestare për rastin „Zinxhiri“ ishin përfshirë 22 persona, ndërsa prokuroria pretendonte se skema përfshinte një rrjet më të gjerë kompanish. Dëmi i vlerësuar për buxhetin e shtetit ishte rreth tetë milionë euro, ndërsa lënda përfshinte edhe dyshime për pastrim të rreth 650 mijë eurove.
Çifligaroski atëherë nuk ishte i qasshëm për organet e ndjekjes, për shkak të së cilës hetimi ndaj tij nuk mund të vazhdonte me marrjen në pyetje. Sipas MPB-së, tani ai dyshohet për bashkim kriminal, evazion fiskal dhe pastrim parash dhe të ardhurash të tjera nga vepra penale.
Arrestimi i tij i mundëson prokurorisë të vazhdojë procedurën dhe ta marrë në pyetje lidhur me dyshimet që kanë të bëjnë me rastin „Zinxhiri“. Për statusin e tij të mëtejshëm dhe masat eventuale për sigurimin e pranisë duhet të vendosin organet kompetente gjyqësore.
Deri në marrjen e një vendimi të formës së prerë gjyqësore, për Çifligaroskën vlen prezumimi i pafajësisë./lideri
