Raporton: Televizioni News
Një thirrje humanitare po qarkullon për të ndihmuar Bekim Shabanin, 45-vjeçarin nga Kumanova, i cili po përballet me një gjendje të rënduar shëndetësore dhe ka nevojë urgjente për transplantim të mëlçisë.
Bekimi, i cili për vite me radhë ka punuar si vëlla medicinal në spital dhe është kujdesur për pacientët, sot ndodhet vetë në një situatë ku ka nevojë për mbështetjen dhe solidaritetin e qytetarëve.
Ai është baba i pesë djemve dhe, sipas familjarëve, me një të ardhur ka punuar vazhdimisht për të siguruar familjen dhe të ardhmen e fëmijëve të tij.
Pas ekzaminimeve mjekësore në spitalin İstinye University Medical Park Gaziosmanpaşa në Stamboll, mjekët specialistë kanë rekomanduar transplantimin e mëlçisë, i cili duhet të realizohet sa më shpejt.
Kostoja e parashikuar e ndërhyrjes është 55 mijë euro, shumë kjo që familja Shabani nuk mund ta përballojë e vetme.
Familjarët dhe organizatorët e kësaj fushate u bëjnë apel të gjithë qytetarëve, mërgimtarëve dhe njerëzve humanë që të kontribuojnë, secili sipas mundësive.
“Bekimi ka punuar vetë në spital, duke u kujdesur çdo ditë për njerëzit që kishin nevojë. Sot është ai që ka nevojë për ne”, thuhet në thirrjen humanitare.
Çdo kontribut, sado i vogël, mund të ndihmojë në mbledhjen e shumës së nevojshme për trajtimin e tij. Ata që nuk kanë mundësi të kontribuojnë financiarisht, ftohen ta shpërndajnë thirrjen, në mënyrë që ajo të arrijë te sa më shumë njerëz.
Bekimi ka nevojë për ndihmën e të gjithëve. Një familje pret, pesë fëmijë presin që babai i tyre të kthehet pranë tyre.