Gjykata ka caktuar tetë ditë paraburgim për 39-vjeçarin A.D. nga fshati Çerkez i Kumanovës, për shkak të kërcënimeve të drejtuara ndaj kryeministrit Hristijan Mickoski përmes rrjeteve sociale.
SPB Kumanovë ka ngritur kallëzim penal ndaj tij për dyshime për kryerjen e veprës penale “rrezikim i sigurisë”, sipas nenit 144, paragrafi 5 të Kodit Penal.
Mickoski, duke iu përgjigjur sot pyetjeve të gazetarëve, tha se kishte mësuar një ditë më parë për kërcënimet dhe se institucionet tashmë kanë ndërmarrë masat përkatëse.
“Kam mësuar dje për kërcënimet e shkruara në rrjetet sociale, se isha një derr dhe do të më therte në shesh. Ka drejtuar sharje ndaj meje dhe familjes sime. Unë jam megjithatë institucion. Institucionet kanë ndërmarrë kompetencat e tyre dhe, përmes Ministrisë së Punëve të Brendshme, personi është siguruar, ndërsa më tej, përmes sistemit gjyqësor, do të dërgohet aty ku e ka vendin”, tha kryeministri.
I dyshuari të premten kishte publikuar një koment me përmbajtje kërcënuese në një postim në profilin e Mickoskit në rrjetet sociale.
Nga Prokuroria Publike njoftuan se 39-vjeçari dyshohet edhe për vepra të tjera penale që lidhen me krimin e dhunshëm, përfshirë dhunën dhe fajde, si dhe për një numër të madh kundërvajtjesh për prishjen e rendit dhe qetësisë publike.
Prokuroria thekson se, bazuar në provat për sjelljen e mëparshme të të dyshuarit, bëhet fjalë për një person konfliktual, i cili vazhdimisht përfshihet në debate, kërcënime dhe përleshje fizike me persona të tjerë.
Për këtë arsye, prokuroria vlerëson se ekziston rrezik real që sjelljet e tij agresive të përshkallëzohen në vepra më të rënda penale, me pasoja që mund të rrezikojnë jetën.