Sali Murat, Halill Snopçe, Rina Ajdari, Jovana Trençevska dhe Jovana Mojsoska janë pesë deputetët të cilët kanë parashtruar më shumë pyetje në Kuvendin e Maqedonisë.
Sipas të dhënave nga platforma pratenici mk, në 34 seanca rë përfshira janë parashtruar gjithsej 736 pyetje deputetësh, prej të cilave 657 kanë marrë përgjigje, ndërsa 79 pyetje janë në pritje të përgjigjes.
Në mesin e deputetëve më aktivë me pyetje janë Sali Murat nga Lëvizja e Turqve me 102, Halil Snopçe nga Aleanca për Shqiptarët me 40, Rina Ajdari nga BDI me 31, Jovanka Trençevska nga LSDM me 28, Jovana Mojsoska nga E Majta me 25.
Më pas vijojnë Arbana Pasholli nga BDI me 24, Rexhep Ismail nga E Majta me 22, Daniella Nikollova nga Lidhja Socialdemokrate e Maqedonisë me 21, Bisera Kostadinovska Stojçevska me 21, Sllavjanka Pertovska nga LSDM me 20.
Më tej janë Dimitar Apasiev nga E Majta me 20, Sanja Llukarevska nga LSDM me 19, Fatmir Bytyqi nga LSDM me 18, Oliver Spasovski nga LSDM me 18 dhe Diana Toska nga BDI me 17.
Sipas grupeve parlamentare më shumë pyetje kanë dorëzuar LSDM-ja me 215, Lëvizja e Turqve me 102, E Majta me 99, VMRO-DPMNE dhe BDI me nga 94 dhe Aleanca për Shqiptarët me 69. Më pas vijojnë partitë tjera me dukshëm më pak pyetje.
Ndërkaq, në mesin e deputetëve më pasiv në Kuvend janë lideri i BDI-së, Ali Ahmeti, ai i PDSH-së, Menduh Thaçi dhe deputetja e VMRO-DPMNE-së, Valentina Marçevska të cilët në gjysmën e parë të vitit të kaluar nuk janë paraqitur asnjëherë për diskutim në Kuvend, nuk kanë propozuar ligj apo amandament dhe nuk kanë qenë anëtarë në ndonjë komision parlamentar.
Platforma tregon se 45 nga gjithsej 120 deputetë nuk janë paraqitur fare për të diskutuar për ndonjë çështje. 78 nga 120 deputetë nuk kanë parashtruar asnjë pyetje në periudhën janar–qershor 2025. (Portalb)