Kreu i Aleancës për Shqiptarët (ASh) z.Arben Taravari i ka bërë akuza të forta kryeministrit Hristijan Mickoski, duke e akuzuar për ndjekje të një politike presioni ndaj shqiptarëve. Në reagimin e tij, Taravari e krahasoi Mickoskin me komandantin francez Napoleon, duke i përcjellë mesazhin se “pushteti politik nuk është i përjetshëm”.
Sipas Taravarit, vendi tashmë ka pasur përvojë me kryeministra të cilët, siç shprehet ai, ishin “të dehur nga pushteti” dhe besonin se shfaqja e forcës përmes goditjeve ndaj shqiptarëve ishte rruga më e lehtë. Ai pretendon se Mickoski aktualisht po ndjek të njëjtën rrugë.
Si argumente për qëndrimet e tij, Taravari përmendi çështjet e fundit që lidhen me përdorimin e gjuhës shqipe, relativizimin e shumicës së Badenterit, si dhe dobësimin e mekanizmave për përfaqësim të drejtë dhe adekuat.
Në të njëjtën kohë, ai kritikoi edhe koalicionin VLEN, duke u vërejtur për heshtjen e tyre përballë këtyre zhvillimeve.
“Napoleoni filloi të humbiste kur besoi se ishte i pathyeshëm. Edhe Mickoski duhet ta kuptojë se shqiptarët nuk janë territor ku një kryeministër e provon fuqinë e tij”, theksoi Taravari në reagimin e tij.
Në përfundim, Taravari tha se asnjë shumicë parlamentare, e as mbështetja e VLEN-it, nuk është garanci për pushtet të përjetshëm, duke rikujtuar se historia ka treguar se rënia e liderëve fillon pikërisht në momentin kur ata mendojnë se janë të paprekshëm.
Vestimak.mk