Shkupi sonte do të jetë mikpritës i një prej koncerteve më të mëdha të kësaj vere, ku këngëtari i njohur shqiptar Yll Limani do të performojë në Stadiumin e ARM-së në kuadër të turneut të tij ndërkombëtar.
Publiku do të ketë mundësinë të dëgjojë live hitet më të njohura të artistit, por edhe këngë nga albumi i tij më i ri, “Thirrëm Sot Ose Nesër”.
Dyert e stadiumit do të hapen në ora 19:00, ndërsa koncerti do të nisë me performancën e këngëtarit Florent Abrashi, i cili do të ngjitet në skenë para Yll Limanit. Ndërkohë, është raportuar se mysafir special mund të jetë Bertan Asllani, megjithëse kjo ende nuk është konfirmuar zyrtarisht.
Përmes një njoftimi drejtuar fansave, Yll Limani ka bërë të ditur se ekipi i tij ka punuar intensivisht për të sjellë një spektakël të paharrueshëm.
“Fokusi është te shfaqja, t’ju garantojmë juve që keni blerë bileta net me muzikë, emocion, lot dhe gëzim”, ka shkruar artisti.
Biletat vazhdojnë të jenë në shitje online përmes avalonbooking.mk dhe karti.com.mk, si dhe në pikat e shitjes së karti.com.mk në mbarë vendin.
Çmimet e biletave janë:
- Regular – 1.500 denarë
- Fan Pit – 2.500 denarë (vetëm 400 bileta)
- VIP – 4.990 denarë
Kujtojmë se Yll Limani mbajti një koncert të suksesshëm edhe verën e kaluar në Shkup, ndërsa edhe këtë vit pritet pjesëmarrje e madhe e fansave nga Maqedonia e Veriut dhe rajoni.