Komisionerja për Zgjerimin e Bashkimit Evropian, Marta Kos tha në Bruksel se ishte “e tmerruar” nga deklarata e ministres serbe, Snezhana Paunoviç, e cila deklaroi se do ta kishte spastruar etnikisht Kosovën në vitin 1998.
“Mund të ketë vetëm tolerancë zero për deklarata të tilla. Nuk ka vend në Evropë për retorikë që justifikon, mbështet dhe lartëson spastrimin etnik dhe personalisht jam vërtet e neveritur që kjo duhet të thuhet në këtë situatë“, tha Kos në një konferencë për shtyp.
Kos shtoi se deklarata të tilla bien në kundërshtim me vlerat njerëzore dhe parimin e fqinjësisë së mirë, pa të cilat nuk zhvillohet integrimi. Po ashtu, theksoi ajo, këto deklarata bien në kundërshtim me dialogun me Kosovën.
“Këto deklarata janë në kundërshtim të drejtpërdrejtë me vlerat e dinjitetit njerëzor, pajtimit, i cili është shumë i nevojshëm, përgjegjësisë dhe marrëdhënieve të fqinjësisë së mirë mbi të cilat është themeluar Bashkimi Evropian dhe pa të cilat nuk mund të zhvillohet procesi i pranimit. Ato janë gjithashtu në kundërshtim me detyrimet e Serbisë ndaj BE-së, dialogun e lehtësuar për normalizimin e marrëdhënieve me Kosovën”, tha Kos.
Ajo kërkoi nga zyrtarët politikë që të veprojnë me përgjegjshmëri.
“Ne presim që udhëheqësit politikë të veprojnë me përgjegjësi dhe të përmbahen nga retorika nxitëse, si dhe të kontribuojnë në ndërtimin e besimit, pajtimit dhe stabilitetit rajonal”, shtoi Komisionerja.
Në një intervistë për TV Kurir të transmetuar të shtunën, Paunoviç tha se “do ta kishte pastruar etnikisht Kosovën në vitin 1998 nëse do të kishte qenë në vendin e Slobodan Millosheviçit”.