Kroacia, e mbështetur nga të paktën katër shtete të tjera anëtare të Bashkimit Evropian, ka bllokuar sërish përparimin e Serbisë në procesin e integrimit europian, duke kushtëzuar hapjen e kapitujve të rinj me dorëzimin e përgjegjësve për sulmin në Banjskë dhe duke dështuar kështu synimet e Beogradit për të ecur përpara këtë korrik.
Sipas burimeve diplomatike, qëndrimit të prerë të Zagrebit zyrtar i janë bashkuar Holanda, Suedia dhe tri vendet e Baltikut, duke dalë kundër hapjes së Klasterit 3 (konkurrenca dhe rritja gjithëpërfshirëse).
Kroacia ka bërë të qartë se nuk do të japë dritën e gjelbër pa u vendosur para drejtësisë nga autoritetet serbe organizatorët dhe pjesëmarrësit e sulmit të armatosur të 24 shtatorit 2023 në Banjskë të Kosovës, ku mbeti i vrarë rreshteri i policisë, Afrim Bunjaku.
Ky kusht i fortë i palës kroate përkon plotësisht edhe me qëndrimin zyrtar të Komisionit Evropian. Komisionerja për Zgjerim, Marta Kos, pati deklaruar në nëntor të vitit 2025 se zbardhja e plotë e rastit të Banjskës mbetet një detyrim ligjor dhe politik i pashmangshëm për Serbinë.
Përveç kërkesave të Kroacisë, shtetet e tjera refuzuese si Holanda kanë shprehur shqetësime të thella për ngecjen e sundimit të ligjit në Serbi. Një zëdhënës i Ministrisë së Punëve të Jashtme të Holandës konfirmoi për Radion Evropa e Lirë se, bazuar në paketën e zgjerimit të vitit 2025, hapja e klasterit të ri në këtë fazë do të ishte në kundërshtim me parimin e meritës dhe performancës së kërkuar.
Një tjetër pengesë madhore për vendet anëtare mbetet refuzimi i vazhdueshëm i Beogradit për të harmonizuar politikën e tij të jashtme me bllokun, specifikisht përmes vendosjes së sanksioneve ndaj Rusisë pas invazionit në Ukrainë.
Serbia mban statusin e vendit kandidat për në BE që nga marsi i vitit 2012. Megjithatë, për shkak të ndjekjes së një politike të jashtme të dyanshme, mungesës së reformave dhe dështimit për të përmirësuar marrëdhëniet e fqinjësisë së mirë me Republikën e Kosovës, shteti serb nuk ka arritur të hapë asnjë kapitull apo klaster të ri negociues që nga viti 2021.
https://www.youtube.com/channel/UC_SXHVF21a9FqvEbtsyNcPg