Posta e Dibrës është pajisur me dy automjete të reja për kryerjen e shërbimeve postare. Në ceremoninë e dorëzimit morën pjesë drejtori i përgjithshëm i Postës së Maqedonisë së Veriut, Orhan Kurtishi, dhe kryetari i Komunës së Dibrës, Fisnik Mela.
Drejtori i përgjithshëm, Orhan Kurtishi, theksoi se Posta e Dibrës ka pasur nevojë për automjete të reja edhe më herët, por se për herë të parë po pajiset me dy vetura të reja për shërbimet postare. Posta e Dibrës ka pasur nevojë për përforcim të kapaciteteve të saj. Sot po dorëzojmë dy automjete të reja, ndërsa nëse paraqitet nevoja edhe për një automjet të tretë, kemi biseduar me drejtorin rajonal të Postës në Ohër që kjo kërkesë të shqyrtohet dhe të realizohet. Besoj se së bashku me kryetarin e Komunës së Dibrës, Fisnik Mela, do të realizojmë edhe projekte të tjera në interes të qytetarëve. Qëllimi ynë është që shërbimet postare për dibranët të jenë sa më cilësore dhe më efikase. Interesi i qytetarëve do të mbetet gjithmonë prioriteti ynë, deklaroi Kurtishi.
Drejtori i Postës në Dibër, Jeton Qormemeti, vlerësoi se pajisja e institucionit me automjete të reja është dëshmi e mbështetjes që posta lokale gëzon nga menaxhmenti qendror. Fakti që Posta e Dibrës për herë të parë pranon automjete të reja për nevojat e saj operative tregon përkushtimin e drejtuesve të Postës së Maqedonisë së Veriut ndaj kësaj njësie. Bashkëpunimi me administratën qendrore është në nivel të lartë dhe presim që edhe në të ardhmen të realizohen projekte të tjera në dobi të qytetarëve, tha Qormemeti.
Duke iu përgjigjur pyetjeve të gazetarëve lidhur me konkurrencën në tregun e shërbimeve postare dhe korrierëve privatë, drejtori i përgjithshëm Orhan Kurtishi tha se së shpejti pritet të rregullohet situata në këtë sektor. Rregullimi i tregut është kompetencë e agjencive përkatëse, ndërsa ne si Postë e Maqedonisë së Veriut i kemi paraqitur qëndrimet dhe kërkesat tona. Konsiderojmë se në disa raste ekziston konkurrencë jolojale, veçanërisht në aspektin e politikave të çmimeve. Megjithatë, pasi të vendoset një rregullim i plotë i tregut, qytetarët do të kenë mundësinë të vlerësojnë vetë se ku ofrohet cilësi më e lartë e shërbimit te posta shtetërore apo te operatorët privatë, deklaroi Kurtishi.
Dy vetura të reja për Postën e Dibrës
